Saturday, August 28, 2010

തിരുവതാം‌കോട് അരപ്പള്ളി

എഡി 63 ല്‍ മാര്‍ത്തോമ്മാശ്ലീഹായാല്‍ സ്ഥാപിക്കപെട്ടതാണ് തിരുവതാം‌കോട് അരപ്പള്ളി. തമിഴ്‌നാട്ടിലെ കന്യാകുമാരി ജില്ലയിലെ തക്കല ജംഗ്‌ഷനില്‍ നിന്നും രണ്ട് കിലോമീറ്റര്‍ ദൂരം സഞ്ചരിച്ചാല്‍ തിരുവതാം‌കോട് അരപ്പള്ളി എന്നറിയപ്പെടുന്ന സെന്റ്‌ മേരീസ് ദേവാലയത്തില്‍ എത്താം.
:: പേരിനു പിന്നില്‍ ::
‘അരപ്പള്ളി’ എന്ന് വിളിക്കുന്നതുകൊണ്ട് ഇത് ഒരു പകുതിപ്പള്ളിയാണ് എന്ന് ധരിക്കരുത്. ആദ്യനോട്ടത്തില്‍ ഒരമ്പലത്തിന്റെ പ്രതീതിയുണ്ടാക്കുന്ന ഈ ദേവാലയം മറ്റു ആരാധനാലയങ്ങളേ അപേക്ഷിച്ച് ചെറുതാണ്. 25 അടി നീളവും 16 അടി വീതിയും 10 അടി ഉയരവും മാത്രം ഉണ്ടായിരുന്ന ഈ ദേവാലയം ഒരു പൂര്‍ണ്ണ ദേവാലയം തന്നെയാണ്. ‘അരപ്പള്ളി’ എന്ന് ഈ പള്ളിയെ വിളിക്കുന്നത് ആദരപൂര്‍വ്വം ആണ്. ‘അര’ എന്ന ശബ്ദ്ദം പകുതി എന്നല്ല രാജകീയം എന്ന അര്‍ത്ഥത്തില്‍ വേണം മനസിലാക്കാന്‍. അരസന്‍(അരചന്‍) എന്ന ദ്രാവിഡ പദത്തിന്റെ അര്‍ത്ഥം രാജാവ് എന്നാണ്. രാജാവിന്റെ സഹായത്തോടെ രാജാവിന്റെ പ്രത്യേക പരിഗണനയില്‍ പണിതീര്‍ത്ത പള്ളിയായതുകൊണ്ടാണ് ഈ പള്ളിക്ക് അരപ്പള്ളി എന്ന പേര് കിട്ടിയത്. കന്യകമാറിയാമിന്റെ പേരിലാണ് ഈ പള്ളി സ്ഥാപിക്കപെട്ടിരിക്കുന്നത്.

:: പള്ളി ::
പള്ളി നിര്‍മ്മിച്ചിരിക്കുന്നത് കരിങ്കല്‍ ഭിത്തികള്‍ കൊണ്ടാണ്. ഈ പള്ളിയുടെ മേല്‍ക്കൂര കരിങ്കല്‍ പാളികള്‍ കൊണ്ടായിരുന്നു നിര്‍മ്മിച്ചിരുന്നത്. പള്ളിയുടെ മുന്‍‌വാതിലിന് 5.5 അടി ഉയരവും 2.5 അടി വീതിയും ഉണ്ട്. പോര്‍ച്ചിഗീസുകാര്‍ സംഭാവന ചെയ്ത പ്രാര്‍ത്ഥനാ പീഠവും ധൂപക്കുറ്റിയും ദേവാലയത്തില്‍ ഉണ്ട്. മരം കൊണ്ട് പണിതിട്ടുള്ള ഈ പ്രാര്‍ത്ഥനാ പീഠത്തിന്റെ വാതിലില്‍ താക്കോലേന്തി നില്‍ക്കുന്ന പത്രോസ് ശ്ലീഹായുടേയും സുവിശേഷത്തിന്റെ പ്രതീകമായ ചുഴറ്റിയ വാളേന്തിയ വി. പൌലോസ് ശ്ലീഹായുടേയും രൂപങ്ങള്‍ കൊത്തി വച്ചിട്ടുണ്ട്. പള്ളിയുടെ പഴമ നിലനിര്‍ത്തി ഹൈക്കലാഭാഗത്തും മുന്‍‌ഭാഗത്തും ചില മാറ്റങ്ങള്‍ വരുത്തിയിട്ടുണ്ട്. പള്ളിയുടെ ഉള്ളില്‍ , ഭിത്തിയില്‍ ഒരു കുരിശു രൂപം കൊത്തി വച്ചിട്ടുണ്ട്.

:: ഇവിടെ എത്തിച്ചേരാനുള്ള വഴി ::
തിരുവന്തപുരം നാഗര്‍‌കോവില്‍ വഴിയില്‍ അഴകിയ മണ്ഢപം സ്റ്റോപ്പില്‍ ഇറങ്ങിയാല്‍ പള്ളിയിലേക്ക് 2 കിലോ മീറ്റര്‍ ദൂരം. കുളച്ചല്‍, മണ്ടക്കാട് ബസുകള്‍ പള്ളിയുടെ സമീപത്തുകൂടിയാണ് പോകുന്നത്. പള്ളിയിലേക്ക് തിരുവന്തപുരത്ത് നിന്ന് 52 കിലോ മീറ്ററും നാഗര്‍ കോവിലില്‍ ഇന്ന് 25 കിലോമീറ്ററും ആണ് ദൂരം. ( തിരുവതാം‌കോടു നിന്ന് കന്യാകുമാരിക്ക് 37 കിലോമീറ്ററും പത്മനാഭപുരം കൊട്ടാരത്തിലേക്ക് 3.5 കിലോമീറ്റര്‍ ദൂരവുമാണ് ഉള്ളത്.)
പള്ളിയിലെ ഫോണ്‍ :: 04651-250219

കൂടുതല്‍ വിവരങ്ങള്‍ ഈ സൈറ്റില്‍ ഉണ്ട് :: http://www.stthomasinternationalpilgrimcentre.com/
:: പള്ളിയുടെ ചിത്രങ്ങള്‍ ::

റോഡില്‍ നിന്ന് പള്ളിയിലേക്കുള്ള കാഴ്ച

പള്ളിയിലേക്കുള്ള വാതില്‍
പള്ളിയുടെ മദ്ബഹ.. ഇതിന് രണ്ട് കിളിവാതിലുകള്‍ ഉണ്ട്

പോര്‍ച്ചിഗീസുകാര്‍ നല്‍കിയ പ്രാര്‍ത്ഥനാ പീഠം
പോര്‍ച്ചിഗീസുകാര്‍ നല്‍കിയ ധൂപക്കുറ്റി

പള്ളിയ്ക്കുള്ളിലെ മാമോദീസ തൊട്ടി

ഭിത്തിയില്‍ കൊത്തിയിരിക്കുന്ന കുരിശു രൂപം

മാര്‍ത്തോമ്മാശ്ലീഹായുടെ തിരുശേഷിപ്പ് പള്ളിയില്‍ സൂക്ഷിച്ചിരിക്കുന്ന പേടകം

പള്ളിയുടെ പ്രധാന വാതില്‍

പള്ളിയുടെ പ്രധാന വാതില്‍

Friday, August 27, 2010

ഇത് മലയാളമാണോ? : ചിത്രം

കന്യാകുമാരിയിലെ(കടല്‍ത്തീരത്ത്) പോലീസ് ഔട്ട് പോസ്റ്റിലെ ഭിത്തിയില്‍ എഴുതി വച്ചിരിക്കുന്നത്.
കണ്ടിട്ട് മലയാള അക്ഷരങ്ങള്‍ ആണന്ന് തോന്നുന്നെങ്കിലും വായിച്ചിട്ട് മലയാളം ആണന്ന് തോന്നുന്നില്ല.



Wednesday, August 18, 2010

കല്ലുത്തരവ് :: ചിത്രം

പത്തനംതിട്ട കളക്‍ട്രേറ്റില്‍ നിന്നുള്ള ചിത്രം...

Wednesday, August 4, 2010

ശനി പിടിച്ച ഗാന്ധിപ്രതിമ

പത്തനംതിട്ടയിലെ സെന്‍‌ട്രല്‍ ജംഗക്ഷനില്‍ 2003 മുതല്‍ ഗാന്ധിപ്രതിമയുണ്ട്. അന്നുമുതല്‍ ഇന്നുവരെപത്തനംതിട്ടയിലെ ഒട്ടുമിക്ക സമരങ്ങള്‍ തുടങ്ങുകയോ അവസാനിക്കുകയോ ചെയ്യുന്നത് ഈ ഗാന്ധിപ്രതിമയുടേ ചുവട്ടിലാണ്. ഏതായാലും 2009 ഏപ്രില്‍ 14 മുതല്‍ ഗാന്ധിപ്രതിമയ്ക്ക് അത്രയ്ക്ക് നല്ല കാലം അല്ലായിരുന്നു. 2010 ജൂലൈ 11 ആം തീയതിയോടെ ഗാന്ധിപ്രതിമയുടെ ദുരന്തം പൂര്‍ണ്ണമായി. ജൂലൈ 11 രാത്രിയില്‍ ലോറി ഇടിച്ചതോടെ(ഇടിപ്പിച്ചതോ?) പ്രതിമ നിന്ന പ്ലാറ്റ്ഫോം തകരുകയും പ്രതിമയ്ക്ക് സാരമായ കേടുപാടുകള്‍ സംഭവിക്കുകയും ചെയ്തു. ഇപ്പോള്‍ ഈ കൈകള്‍ നഷ്ടപ്പെട്ട ഗാന്ധിപ്രതിമയെ ഒരു നീല ടാര്‍പ്പാ കൊണ്ട് പൊതിഞ്ഞ് സെന്‍‌ട്രല്‍ ജംഗക്ഷനില്‍ തന്നെ വച്ചിട്ടൂണ്ട്. എന്തിനാണ് ഈ പ്രതിമ ഇവിടെതന്നെ ഇങ്ങനെ വച്ചിരിക്കുന്നതന്ന് അറിയില്ല.

2009 ഏപ്രില്‍ 14 നാണ് ലോക്സഭാതിരഞ്ഞെടുപ്പോട് അനുബന്ധിച്ച് നടന്ന് കൊട്ടിക്കലാശത്തില്‍ രാഷ്ട്രീയപാര്‍ട്ടികളുടെ ഫ്ലക്സുകളും കൊടികളും ഉയര്‍ത്തിയ തടികഷ്ണങ്ങള്‍ കൊണ്ട് പുറം പൊളിഞ്ഞ ഗാന്ധിപ്രതിമയുടെ പുനര്‍‌നിര്‍മ്മാണത്തിന് നേരെ രാഷ്ട്രീയപാര്‍ട്ടികല്‍ മുഖം തിരിച്ചു എങ്കിലും പ്രതിമസ്ഥാപിച്ച ജേസിസ് തന്നെ പുനര്‍നിര്‍മ്മാണത്തിനുള്ള ചിലവ് വഹിക്കുകയും പ്രതിമയുടെ കേടുപാടുകള്‍ പരിഹരിക്കുകയും ചെയ്തിരുന്നു. (ഏതെങ്കിലും രാഷ്ട്രീയപാര്‍ട്ടികളുടെ കൊടിമരത്തിന് എതെങ്കിലും കേടുപാടുകള്‍ സംഭവിച്ചായിരുന്നെങ്കില്‍ വമ്പിച്ച പ്രതിഷേധയോഗം നടത്തി കൊടിമര പുനര്‍നിര്‍മ്മാണത്തിനുള്ള ഫണ്ട് പിരിവ് അവര്‍ കെങ്കേമം ആക്കിയേനെ. സ്വന്തമായി ഒരു വടിയല്ലാതെ കൊടിയില്ലാത്ത ഗാന്ധിജിക്ക് എന്ത് സംഭവിച്ചാലും എന്ത്???)

പുറം തിരിച്ച് കിട്ടിയ ഗാന്ധിജിക്ക് പിന്നീടും നിക്കപ്പൊറുതി ഉണ്ടായിട്ടില്ല. പത്തനംതിട്ടയില്‍ എന്തെങ്കിലും ഒരു പരിപാടി നടന്നാല്‍ അതിന്റെ ഫ്ലക്സ് ഗാന്ധിപ്രതിമയില്‍ കെട്ടിവച്ചില്ലങ്കില്‍ എന്തോ ഒരു പോരായ്മായായി പല സംഘാടകര്‍ക്കും തോന്നുകയും ചെയ്തതിന്റെ ഫലമായി ഗാന്ധിപ്രതിമ ഫ്ലക്സ് താങ്ങിയായി രൂപാന്തരപെട്ട് തുടങ്ങിയപ്പോള്‍ ജില്ലാഭരണകൂടം രാഷ്ട്രീയ പാര്‍ട്ടികളുടെ യോഗം വിളിക്കുകയും ഗാന്ധിപ്രതിമയില്‍ ഫ്ലക്സോ കൊടികളോ കെട്ടുകയില്ലന്ന് ഗാന്ധിയെ പിടിച്ച് പാര്‍ട്ടികള്‍ സത്യം ചെയ്തു. പിന്നീട് വലിയ പ്രശ്നങ്ങള്‍ ഇല്ലാതെ മുന്നോട്ട് പോകുമ്പോഴാണ് കഷ്ടകാലം ലോറിയുടെ രൂപത്തില്‍ ഗാന്ധിപ്രതിമയില്‍ വന്നിടിച്ചത്. അതോടെ പ്രതിമയെ റോഡിലേക്ക് ഇറക്കിവച്ച് ടാര്‍പ്പാകൊണ്ട് മൂടുകയും പ്ലാറ്റ്ഫോം വീണ്ടും പണിയാനും തുടങ്ങി. ഒരു പ്രധാന പ്രശ്നം എന്താണന്ന് വച്ചാല്‍ ലോറി വന്ന് ഇടിച്ചതോടെ പ്രതിമയുടെ പലഭാഗങ്ങളും അടരുകയും പൊട്ടുകയും ചെയ്തു. ഈ പ്രതിമകളെക്കുറിച്ചൊക്കെ അറിയാവുന്നവര്‍ പറയുന്നത് ലോറിയുടെ ഇടികിട്ടിയ ഗാന്ധിപ്രതിമ ഇനി അവിടെ വയ്ക്കാന്‍ കൊള്ളില്ലാന്നാണ്. ഈ ഗാന്ധിപ്രതിമ വയ്ക്കാന്‍ കൊള്ളില്ലങ്കില്‍ പിന്നെന്തിനാണ് പ്രതിമയെ ടാര്‍പ്പാ പൊതിഞ്ഞ് വച്ചിരിക്കുന്നതന്ന് മനസിലായിട്ടില്ല. എല്ലാവരും ഗാന്ധി പ്രതിമ കണ്ടോട്ടെ എന്നാണങ്കില്‍ ആ ടാര്‍പ്പാളിന്‍ മാറ്റിയിട്ട് വയ്ക്കാമായിരുന്നു.അങ്ങനെയായിരുന്നെങ്കില്‍ നമ്മള്‍ ഗാന്ധിപ്രതിമയോട് എന്തെല്ലാം ചെയ്തിട്ടുണ്ടന്ന് നമുക്കൊന്ന് അടുത്തറിയുകയും ചെയ്യാമായിരുന്നു.

കഴിഞ്ഞ ലോകസഭാ തിരഞ്ഞെടുപ്പിനു ശേഷം എടുത്ത ഗാന്ധിപ്രതിമയുടെ ചിത്രങ്ങള്‍

പുറം പോയ ഗാന്ധിജി : 2009 ഏപ്രിലില്‍ എടുത്ത ചിത്രം2010 ജനുവരി ഒന്നിന് എടുത്ത ചിത്രം
ഗാന്ധിയുടെ വടിയില്‍ ആരോ ഒരു കൊടി കെട്ടിവച്ചിരിക്കുന്നു

ഇങ്ങനെയൊക്കെയാണ് നമ്മള്‍ ഗാന്ധി പ്രതിമയോട് ചെയ്യുന്നത്

2010 ആഗസ്റ്റ് ന് എടുത്ത ഗാന്ധിപ്രതിമയുടെ ചിത്രം

ഇപ്പോള്‍ പ്രതിമ ഇങ്ങനെ ടാര്‍പ്പാളിന്‍ ഇട്ട് കെട്ടിവച്ചിരിക്കുകയാണ്. കൈവരികള്‍ ഒന്നും ഇല്ലാത്ത ഈ ഗാന്ധിപ്രതിമയെ ചുറ്റിയാണ് സെന്‍‌ട്രല്‍ ജംഗക്ഷനില്‍ യു ടേണ്‍ എടുക്കുന്നത്.

പത്തനംതിട്ടയിലെ ഗാന്ധിപ്രതിമയെ സംബന്ധിച്ച മറ്റ് പോസ്റ്റുകള്‍ ഇവിടെ വായിക്കാം..

http://shibu1.blogspot.com/search/label/ഗാന്ധിജി