ലോക്ക്ഡൗൺ പഴഞ്ചൊല്ലുകൾ

അമ്പതുവർഷങ്ങൾക്കുശേഷമുള്ള പഴഞ്ചൊല്ലുകൾ

1.    അച്ഛൻ മാസ്ക് വെച്ചാൽ മകനു കൊറോണ പിടിക്കാതിരിക്കുമോ (അച്ഛൻ ആനപ്പുറത്തു കയറിയാൽ മകനു തഴമ്പുണ്ടാകുമോ)

2. അകപ്പെട്ടാൽ ദേശസഞ്ചാരിയും ക്വാറന്റൈനിൽ കിടക്കും. (അകപ്പെട്ടാൽ പന്നി ചുരയ്ക്ക തിന്നും.)

3. ഐസുലേഷനിൽ  പോകുന്നവനെ അരികത്തു വിളിച്ചാൽ അരയ്ക്കാത്തുട്ട് ചേതം. (അകലെ പോകുന്നവനെ അരികത്തു വിളിച്ചാൽ അരയ്ക്കാത്തുട്ട് ചേതം.)

4. വാട്സാപ് ജ്ഞാനം ആളേക്കൊല്ലും (അല്പജ്ഞാനം ആളേക്കൊല്ലും)

5. അഴകുള്ള മാസ്ക്കിൽ ഇലാസ്റ്റിക് വള്ളിയില്ല  (അഴകുള്ള ചക്കയിൽ ചുളയില്ല)

6. കൊറോണഎന്നതു ഞാനറിയും വാട്സാപ്പിലെ ഫോർവേഡ് പോലെ  (അഞ്ജനമെന്നതു ഞാനറിയും മഞ്ഞളുപോലെ വെളുത്തിരിക്കും)

7. മാസ്ക് വെച്ചില്ലങ്കിൽ ട്രമ്പും വീഴും  (അടി തെറ്റിയാൽ ആനയും വീഴും)

8.  വാട്സാപ് ബുദ്ധിക്ക് അൽപ്പായുസ്സ്  (അതിബുദ്ധിക്ക് അൽപ്പായുസ്സ്)

9. മാസ്ക് വച്ചില്ലങ്കിലും രണ്ടു പക്ഷം.  (അമ്മയെ തല്ലിയാലും രണ്ടു പക്ഷം.)

10. ലിപ്സ്റ്റിക് കൊതിച്ചു മാസ്ക് വെടിഞ്ഞവൾക്ക് ലിപ്സ്റ്റികും ഇല്ല, മാസ്കും ഇല്ല  (അരചനെ കൊതിച്ചു പുരുഷനെ വെടിഞ്ഞവൾക്ക് അരചനും ഇല്ല, പുരുഷനുമില്ല)

11. മാസ്ക് വയ്ക്കാത്ത പിള്ള കൊവിഡ് വരുമ്പോൾ അറിയും  (അറിയാത്ത പിള്ള ചൊറിയുമ്പോൾ അറിയും)

12.ആരാൻറെ അമ്മക്ക് കൊറാണ വന്നാൽ  കാണാൻ നല്ല ചേല് (ആരാന്റെ അമ്മക്ക് ഭ്രാന്തായാൽ കാണാൻ നല്ല ചേല്)

13. മാസ്ക് മൂക്കിൽ വെച്ചിട്ട് വേണം വള്ളി കെട്ടാൻ  (ഇരുന്നിട്ടു വേണം കാൽ നീട്ടാൻ)

14. ചിങ്ങം തൊട്ടു കർക്കിടികംവരെ മാസ്ക് ഇടാതിറങ്ങല്ലേ  (ഇടവം തൊട്ടു തുലാത്തോളം കുട കൂടാതിറങ്ങല്ലേ)

15.  കൊറോണവന്നവന്  എലിപ്പനി പിടിച്ചു  (ഇടി വെട്ടിയവനെ പാമ്പുകടിച്ചു)

16.  സ്പിരിറ്റ് പോലെ വരുമോ സാനിറ്റൈസർ (ഉപ്പുപോലെ വരുമൊ ഉപ്പിലിട്ടതു)

17. ഇട്ട മാസ്ക് നശിപ്പിക്കാൻ മറക്കരുത്    (ഉണ്ടചോറു മറക്കരുത്)

18. അടയ്ക്കാത്ത സാനിറ്റൈസർ ആവിയാകും (ഉടുക്കാവസ്ത്രം പുഴുതിന്നും)

19. കൊറോണയെ പേടിച്ച് നാട് അടച്ചിടുക. (എലിയെ പേടിച്ച് ഇല്ലം ചുടുക.)

20. കൈകഴുകിയില്ലങ്കിലും മാസ്ക് അഴയിൽ തൂക്കിയിടണം  (കുളിച്ചില്ലെങ്കിലും കോണകം പുരപ്പുറത്ത്.)

21.    മാസ്ക് വെച്ചാലും കൈ മൂക്കിൽ. (കുറുക്കൻ ചത്താലും കണ്ണ് കോഴിക്കൂട്ടിൽ.)

22.    മാസ്ക് ഇല്ലാത്തെ മുഖവും കഴുകാത്ത കൈയും (കൈ വിട്ട കല്ലും, വായ് വിട്ട വാക്കും.)

23.    മാസ്ക് ഇല്ലാതെ ഇല്ലാതെ ഇറങ്ങിയാൽ പിഴ പിന്നയും ഇറങ്ങിയാൽ ജയിലിൽ. (ചെമ്മീൻ തുള്ളിയാൽ മുട്ടോളം പിന്നെയും തുള്ളിയാൽ ചട്ടീല്.)

24.    കൊറോണവന്നവന്റെ മാസ്ക് നോക്കണോ? (ചത്തകുഞ്ഞിൻറെ ജാതകം നോക്കണോ?)

25.    ചത്തു കിടന്നാലും മാസ്ക് വെച്ച് കിടക്കണം (ചത്തു കിടന്നാലും ചമഞ്ഞു കിടക്കണം)

26.    ലോക്ക്ഡൗൺ കാലത്ത് യാത്രാസൗകര്യം നൽകാതെ  നടന്നുപോകുമ്പോൾ മരിച്ചാൽ ധനസഹായം നൽകുക  (കഞ്ഞി നൽകാതെ കൊന്നിട്ടു പാൽപായസം തലയിലൊഴിക്കുക.)

27.    കൊറോണയ്ക്കുണ്ടോ ഞായറും ഹർത്താലും? (കാട്ടുകോഴിക്കുണ്ടോ ശനിയും സംക്രാന്തിയും?)

28.  ടിക്കറ്റെടുക്കാൻ കാശില്ലാത്തവൻ സ്വന്തം നാട്ടിൽ പോകേണ്ട (കാശില്ലാത്തവൻ കാശിക്കു പോകേണ്ട)

29.  മാസ്ക് പോയാൽ കടുക് പാത്രത്തിലും തപ്പണം (കുന്തം പോയാൽ കുടത്തിലും തപ്പണം.)

30.  മൂക്കെത്ര മാസ്ക് കണ്ടതാ. (കൊക്കെത്ര കുളം കണ്ടതാ.)

31.  ദാനം കിട്ടിയ സാനിറ്റൈസറിലെ ആൽക്കഹോൾ പെർസന്റേജ് നോക്കരുത് / ദാനം കിട്ടിയ മാസ്കിന്റെ നിറം നോക്കരുത്  (ദാനം കിട്ടിയ പശുവിന്റെ വായിലെ പല്ലെണ്ണരുത്)

32.   കർഫ്യു പേടിച്ച് നാട്ടിൽ പോയപ്പോൾ അവിടെ ജനതാകർഫ്യു   (പട പേടിച്ച് പന്തളത്ത് പോയപ്പോൾ അവിടെ പന്തംകൊളുത്തിപ്പട.)

33.  പുത്തനച്ചി മാസ്ക് തയ്ച്ച് കൊടുക്കും  (പുത്തനച്ചി പുരപ്പുറം തൂക്കും.)

34.  മുഖത്ത് വെയ്ക്കുന്നതെല്ലാം മാസ്ക്കല്ല  (മിന്നുന്നതെല്ലാം പൊന്നല്ല.)

35.  കൊറോണരഹിത കാലത്ത് തൈ പത്ത് വെച്ചാൽ ലോക്ക്ഡൗൺകാലത്ത് കാ പത്ത് തിന്നാം...  (സമ്പത്തുകാലത്ത് തൈ പത്തു വെച്ചാൽ, ആപത്തുകാലത്ത് കാ പത്തു തിന്നാം)

36.  തിക്കിത്തിരക്ക് ദുഃഖമാണുണ്ണീ സാമൂഹിക അകലമാണല്ലോ സുഖപ്രദം

37.   എല്ലാ വൈറൽ പനിയും കോവിഡില്ല പക്ഷേ എല്ലാ കോവിഡും വൈറൽ പനിയാണ്.

38.    ലോക്ക്ഡൗൺ കാലത്ത് ഒരു ട്രയിനിട്ടാൽ പതിനായിരം ആൾക്കാർ  (അരിയെറിഞ്ഞാൽ ആയിരം കാക്ക)

39.    ലോക്ക്ഡൗണുള്ള നാട്ടിൽ ചെന്നാൽ വീട്ടിൽ ഇരിക്കണം.  (ചേരയെ തിന്നുന്ന നാട്ടിൽ ചെന്നാൽ നടുത്തുണ്ടം തിന്നണം.

40.    കൈ കഴുകി തടയാനുള്ളത് വെന്റിലേറ്റർകൊണ്ട് തടയാൻ നോക്കരുത് (സൂചികൊണ്ടെടുക്കാനുള്ളത് തൂമ്പകൊണ്ടെടുക്കരുത്)

41.    പോലീസ് പിടിച്ചില്ലങ്കിലും മാസ്ക് വെക്കാതെ തേരാപ്പാരാ നടക്കരുത്  (ശകുനം നന്നായാലും പുലരുവോളം കക്കരുത്)

42.    സാമൂഹിക അകലം പാലിക്കാത്തവന് കൊറോണകൊണ്ട് ക്വാറന്റീൻ  (വേലി ചാടുന്ന പശുവിനു കോലുകൊണ്ട് മരണം)

43.    വേണമെങ്കിൽ മാസ്ക് ജട്ടി തുണിയിലും തയ്ക്കാം.  (വേണമെങ്കിൽ ചക്ക വേരിലും കായ്ക്കും)

44.    കൈകഴുകാതെ നടക്കുന്നവനോട് കൊറോണയെക്കുറിച്ച് പറഞ്ഞിട്ട് കാര്യമില്ല  (വെട്ടാൻ വരുന്ന പോത്തിനോട് വേദമോതിയിട്ട് കാര്യമില്ല)

45.    കൈ കഴുകി മാസ്ക്‌വെച്ച് സാമൂഹിക അകലം പാലിച്ചാൽ കൊറോണയെ പേടിക്കേണ്ട (ആനപ്പുറത്ത് ഇരുന്നാൽ പട്ടിയെ പേടിക്കേണ്ട)

46.    നമ്മളു കോവൊഡുകാരന്റെ അടുത്ത് ചെന്നാലും , കോവിഡുകാരൻ നമ്മുടെ അടുത്ത് വന്ന് നിന്നാലും കേട് നമുക്കാണ്  (ഇല ചെന്നു മുള്ളിൽ വീണാലും , മുള്ള് വന്ന് ഇലയിൽ വീണാലും കേട് ഇലയ്ക്ക്) 

47.    കോവിഡിനെ തന്നെ നിനച്ചിരുന്നാൽ , വരുന്ന പനിയെല്ലം കോവിഡെന്നു തോന്നും (ഒരുത്തനെ തന്നെ നിനച്ചിരുന്നാൽ , വരുന്നതെല്ലാം അവനെന്ന് തോന്നും!)

48.    കൈ കഴുകാത്തവന്റെ കൈയ്യിലെ ഹാൻഡ്‌വാഷ് പോലെ  (കുരങ്ങന്റെ കൈയ്യിലെ പൂമാല പോലെ)

49.    കണ്ണ് മറച്ച് മാസ്ക് കെട്ടരുത്  (തല മറന്ന് എണ്ണ തേക്കരുത്)

50.    കഴുകാത്ത കൈ കൊണ്ട് കണ്ണ് ചൊറിയരുത്   (തീക്കൊള്ളിക്കോണ്ട് തല ചൊറിയരുത്)

 കൊറോണ , ലോക്ക്ഡൗൺ , പഴഞ്ചൊല്ലുകൾ

ദുരന്തങ്ങൾ വരുന്ന വഴി....

രണ്ട്മൂന്ന് മാസങ്ങൾക്ക് മുമ്പാണ്.  സ്കൂളിൽ നിന്ന് വരുന്ന മോളെ വിളിക്കാൻ ഞാൻ വീട്ടിൽ നിന്ന് റോഡിലേക്ക് പോകുന്നു. ഒരു വീടുകൂടി കടന്നു വേണം എനിക്ക് റോഡിൽ എത്താൻ. ആ വീട്ടിലെ പ്ലസ് വൺകാരന്റെ ശബ്ദ്ദം കേട്ട് ഞാൻ നിന്നു...

"എടാ മണ്ടാ നിന്റെ തോക്ക് എനിക്ക് താടാ‍ാ...."

"ദേണ്ടടാ  കത്തി , അതെടുത്ത് കുത്ത്..."

"എനിക്ക് തോക്കില്ലടാ ... നിന്റെ തോക്ക് താടാ..."

"അവനെ കൊല്ലടാ... ദോണ്ടടാ നിന്റെ സൈഡിൽ കൂടി പോകുന്നു . അവനെ വെടിവയ്ക്ക്..."

എന്താ സംഭവം എന്ന് എനിക്ക് മനസിലാകാതെ നിന്നു. അവൻ മൊബൈലും പിടിച്ച് കസേരയിൽ ഇരുന്ന്  ഞെരിപിരി കൊള്ളുന്നത് എനിക്ക് റോഡീൽ നിന്ന് കാണാം. കൊല്ലടാ, കുത്തടാ , ഓടടാ എന്നൊക്കെ ഇവൻ വീണ്ടും വീണ്ടും പറയുന്നുണ്ട്. സംഗതി എന്താണന്ന് അറിയാൻ ഞാൻ കയറി ചെന്നു. ഞാൻ ചെന്നതൊന്നും അവൻ അറിഞ്ഞിട്ടില്ല. ഞാനവന്റെ മൊബൈലിലേക്ക് നോക്കി. അവനിരുന്ന് ഓൺലൈൻ ഗെയിം കളിക്കുകയാണ്. കൂടെ കളിക്കുന്നവരോടാണ് കൊല്ലാനും വെട്ടാനും കുത്താനുമുള്ള നിർദ്ദേശങ്ങൾ....

***********************************

കഴിഞ്ഞ ദിവസം പത്തനംതിട്ടയിൽ നിന്നൊരു ദുരന്ത വാർത്ത.
പത്താം ക്ലാസ് കാരനെ അവന്റെ കൂട്ടുകാർ വെട്ടിക്കൊന്നു. !!! 

ഓൺലൈൻ ഗെയിം കളിച്ചപ്പോൾ കളിയാക്കിയതിന്റെ പ്രതികാരമാണന്നോ ഫോൺ കൊടുക്കാത്തതിലുള്ള വൈരാഗ്യം ആണന്നോ കൊലപാതക കാരണം പറയുന്നു.

എത്ര നിസാരമായാണ് കൊലപാതകം നടത്തിയത്. ആദ്യം കല്ലെറിഞ്ഞ് വീഴ്ത്തി. പിന്നീട് അടുത്ത കുളത്തിൽ പോയി കുളിച്ച് വന്നിട്ട് അടുത്ത് എവിടെ നിന്നോ കോടാലി (മഴു) എടുത്തുകൊണ്ട് വീണു കിടന്നവന്റെ കഴുത്തിന് മുൻവശത്തും പുറകുവശത്തും വെട്ടിയന്ന്... (സത്യം പറഞ്ഞാൽ ഈ വാർത്ത വായിച്ച് ഞാൻ ഞെട്ടി.) പതിനഞ്ചോ പതിനാറോ വയസുള്ള കുട്ടികളാണ് ഈ ക്രൂരകൃത്യം ചെയ്തിരിക്കൂന്നത്. തങ്ങൾ ദിവസവും കാണുന്ന/കളിക്കുന്ന ഗെയിമുകളിലെ കൊലകൾ എത്ര ഭയാനകമായാണ് അവരെ കീഴടക്കിയിരിക്കുന്നത്?? വിർച്യൽ ലോകത്ത് വരച്ചുണ്ടാക്കിയ മനുഷ്യരെ കൊല്ലുന്നതുപോലെ തങ്ങളുടെ ഒരു കൂട്ടുകാരനെ കൊല്ലാൻ തക്കവണ്ണം മാനസിക കരുത്ത് നേടാൻ അവർക്ക് ആ ഗെയിമുകളിൽ കൂടി കഴിഞ്ഞു എങ്കിൽ നമ്മൾ ഭയപ്പെടേണ്ടി ഇരിക്കുന്നു... നമ്മുടെ കുട്ടികൾക്ക് വെർച്വലും റിയലും ഒന്നും തിരിച്ചറിയാൻ കഴിയാതായ്യിരിക്കുന്നു....

 

കൊലപാതക (ഓൺലൈൻ) ഗെയിമുകളിൽ മുഴകി ഇരിക്കുന്ന കുട്ടികളെ രക്ഷിക്കാൻ നമുക്ക് സാധിക്കുമോ? എന്ന ചോദ്യമാണ് അവശേഷിക്കുന്നത്. ഇവരുടെ മൊബൈൽ ഒന്നു നിങ്ങൾ മാറ്റിവെച്ച് നോക്കിയിട്ടൂണ്ടോ? മാനസികവിഭ്രാന്തി പിടിച്ചവരെപ്പോലെ ഇവർ പെരുമാറുന്നത് നമുക്ക് കാണാൻ കഴിയും (ഞാൻ കണ്ടിട്ടുണ്ട്). ഭൂരിഭാഗം കുട്ടികൾക്കും മാതാപിതാക്കൾ തന്നെയായിരിക്കും ഫോൺ വാങ്ങി നൽകിയത്? എന്തിനുവേണ്ടി ഫോൺ വാങ്ങി നൽകി എന്നതിന് ശരിയായ ഒരു ഉത്തരം പറയാൻ മാതാപിതാക്കൾക്കും കഴിയാറില്ല. ഏത് ഉദ്ദേശത്തിനുവേണ്ടി അവർക്ക് ഫോൺ നൽകി ആ ഉദ്ദേശത്തിനു വേണ്ടി അവർ ഫോൺ ഉപയോഗിക്കുന്നുണ്ടോ എന്ന് മാതാപിതാക്കൾ ശ്രദ്ധിക്കാറുമില്ല.

കുട്ടികൾ നമ്മുടെ ആണ്. അവർ നഷ്ടപ്പെട്ടാൽ ജീവിതാവസാനം വരെ നമുക്ക് സങ്കടം മാത്രമേ . നാട്ടുകാർക്കോ ബന്ധുക്കൾക്കോ പറയാൻ ഒരു കഥമാത്രം. സ്വന്തം മക്കൾ കഥാപാത്രങ്ങൾ മാത്രമായി അവശേഷിക്കേണ്ടവർ ആണോ എന്ന് മാതാപിതാക്കളാണ് ചിന്തിക്കേണ്ടത്. നമ്മുടെ മക്കളെ കൊലയാളി/കൊലപാതക ഗെയിമുകളിൽ നിന്ന് രക്ഷിക്കേണ്ടത് നമ്മൾ തന്നെയാണ്... കാരണം നഷ്ടപ്പെടുന്നത് നമുക്ക് മാത്രമാണ്......

 ഓൺലൈൻ ഗെയിം , കൊലപാതകം , മൊബൈൽ ,

ഉയിർത്തെഴുന്നേൽക്കാൻ മറന്നവൻ(ൾ)

നീ നൽകിയ ചുംബനങ്ങളിലെ രക്തതുള്ളികൾ

എനിക്കായി തീർത്ത ക്രൂശുമരണത്തിലെ

ഹൃദയം തകർത്തുകയറിയ ആണിയുടെ

മുനയിൽ തെറിക്കുന്ന നിണമെന്നറിഞ്ഞില്ല ഞാൻ.

നിന്റെ പ്രണയം ഞാൻ സ്വയം അണിഞ്ഞ

മുൾക്കിരീടമായിരുന്നല്ലേ?

മനസ്‌ മുറിപ്പെടുത്തിയ കുത്തുവാക്കുകളിൽ 

ഒഴുകിയത് എന്റെ ഉള്ളിലെ പ്രണയമായിരുന്നു.

നീ  നേടിയ വെള്ളിക്കാശുകൾ ഒരിക്കൽ

വെറും ലോഹക്കഷ്ണങ്ങൾ മാത്രമാവും.

നീ വിധിച്ച ശിക്ഷ ഏറ്റുവാങ്ങിയ ഞാൻ

ഉയിർത്തെഴുന്നേൽക്കാനാവാതെ തളർന്നുപോകുന്നു....

കാരണം നിനക്ക് ഞാൻ നൽകിയ ചുബനങ്ങൾ 

എന്റെ ജീവശ്വാസമായിരുന്നു...

രുചി

ഞാൻ ഉണ്ടാക്കിയ ബ്രൂ കോഫിയെക്കാൾ
രുചി ആയിരുന്നു
അമ്മ ഇട്ടുതന്ന കട്ടൻ കാപ്പിക്ക്
കാരണം
ആരും അറിയാതെ അമ്മ അതിൽ
വാത്സല്യവും ഇട്ടിരിക്കാം

ഞാൻ ഉണ്ടാക്കിയ ചായയെക്കാൾ
രുചി ആയിരുന്നു
ഭാര്യ ഇട്ടുതന്ന ചായക്ക്
കാരണം
എന്നൊടുള്ള പ്രണയവും അവൾ
അതിലിട്ട് തിളപ്പിച്ചിരിക്കാം

ഞാൻ ഉണ്ടാക്കിയ കട്ടൻ‌ ചായയെക്കാൾ
രുചിക്കുറവായിരുന്നു
അപ്പൻ ഇട്ടുതന്ന കട്ടൻ ചായക്ക്
അതിനൊരു കവർപ്പായിരുന്നു
പക്ഷേ
വർഷങ്ങൾക്ക് ശേഷം
അപ്പനിട്ടുതന്ന കട്ടൻ ചായയുടെ രുചി
എന്റെ രുചി മുകുളങ്ങൾ വീണ്ടെടുത്തു
അപ്പോഴതിനു നല്ല രുചിയുണ്ടായിരുന്നു
കാരണം
അപ്പന്മാരുടെ സ്നേഹം
ചിപ്പിക്കുള്ളിലെ മുത്തുപോലെയാണ്.

സ്കൂൾ 'വർഷ' (മഴ) ഓർമ്മകൾ......

ജൂൺ 1.

ഒരു പുതിയ അദ്ധ്യയനവർഷം തുടങ്ങുകയാണ്.... നമ്മളെ സംബന്ധിച്ച് ജൂൺ ഒന്ന് എന്ന് പറയുന്നത് സ്കൂൾ തുടക്കം മാത്രമല്ല കാലവർഷത്തിന്റെ ആരംഭം കൂടിയാണ്.... സ്കൂൾ തുറക്കുമ്പോൾ സ്കൂളിലേക്ക് പോകുമ്പോൾ ഇടവപ്പാതി കൂടെ പെയ്തിറങ്ങുമ്പോൾ എന്ത് രസമായിരുന്നു..... വസ്ത്രങ്ങളെയും പുസ്തകങ്ങളെയും മഴ നനയ്ക്കുമെങ്കിലും ഒരിക്കൽ പോലും മഴയെ  വെറുത്തിരുന്നില്ല..... നൂലുപോലെ പെയ്തിറങ്ങുന്ന മഴയിൽ നമ്മളിങ്ങനെ നടക്കും.... മഴയിൽ അലിഞ്ഞു ചേരാൻ കൊതിക്കുമെങ്കിലും മഴ നമ്മളെ അലിയിക്കാതെ നനച്ചുകൊണ്ടേ ഇരിക്കും......

സ്കൂൾ ഓർമ്മകളിൽ എപ്പോഴും മഴയുണ്ട്... മഴനനഞ്ഞ് പോയതും ബുക്കുകൾ പ്ലാസ്റ്റിക് കവറിലാക്കി മഴയെ വെല്ലുവിളിച്ച് നടന്നതുമൊക്കെ ചിതലെടുത്ത് തുടങ്ങുന്ന ഓർമ്മകളിൽ ഇപ്പോഴും മായതെ നിൽക്കുന്നുണ്ട് ... 

1. വാഴമുട്ടം കൊച്ചുസ്കൂൾ (ഗവ എൽ.പി.എസ് വാഴമുട്ടം)

പണ്ട് കൊച്ചു സ്കൂളിൽ പഠിക്കുമ്പോൾ എനിക്കൊരു കുടയുണ്ടായിരുന്നു....ഒരു തുണിക്കുട!! സെന്റ്.ജോർജിന്റെ കുടയാണന്നാണ് ഓർമ്മ. വലിയ മഴയാണങ്കിൽ ആ കുട നനഞ്ഞ് കുതിർന്ന് ഉള്ളിലേക്ക് വെള്ളം തുള്ളിയായി  വീഴും... ആ കുടയുടെ പിടി ഗ്ലാസുപോലുള്ള എന്തോകൊണ്ട് ഉണ്ടാക്കിയതായിരുന്നു....  ആ പിടിയിലെ പൂക്കൾ ആയിരുന്നു അതിന്റെ പ്രത്യേകത.... കുറച്ചു നാളുകൾ കഴിഞ്ഞപ്പോൾ ആ പിടി പൊട്ടി പിടിയില്ലാക്കൊടയായി അത് മാറി.......

കൊച്ചുസ്കൂളിൽ പുസ്തകങ്ങൾ കൊണ്ടുപോകാൻ എനിക്കൊരു അലൂമിനിയം പെട്ടി ഉണ്ടായിരുന്നു...(ഇപ്പോൾ അത്തരം പെട്ടികൾ ചില ബാങ്കുകളിൽ കണ്ടിട്ടൂണ്ട്). ആദ്യനാളുകളിൽ ആ പെട്ടിയുടെ കൊളുത്ത് മുറക്കമായിരുന്നു...പിന്നീട് അത് തുറന്നു പോകാൻ തുടങ്ങിയപ്പോൾ കൊളുത്ത് തുറക്കാതിരിക്കാൻ കമ്പുകൾ വെക്കാൻ തുടങ്ങി... മഴ പെയ്യുമ്പോൾ ആ പെട്ടിയിലെ പുസ്തകങ്ങളും നനയും....  പുസ്തകങ്ങൾ അടുപ്പത്ത് വെച്ച് ഉണക്കി എടുക്കണം.... ചെറിയ ചാറ്റമഴയാണങ്കിൽ പെട്ടികൊണ്ട് ഒരു ഗുണം ഉണ്ട് തലയിൽ വെച്ചുകൊണ്ട് നടന്നാൽ തലയിൽ വെള്ളം വീഴില്ല..... കൊച്ചു സ്കൂൾ എന്ന് പറയുമ്പോൾ അത് അത്ര കൊച്ചു സ്കൂൾ ഒന്നും ആയിരുന്നില്ല അന്ന് അത്. വാഴമുട്ടം ഗവ.എൽ.പി. സ്കൂൾ ആണ് ഞങ്ങടെ കൊച്ചു സ്കൂൾ.....

ആ സ്കൂളിന്റെ ക്ലാസ് മുറിയിലെ പഠിത്തക്ലാസുകൾ ഒന്നും ഓർമ്മയിൽ ഇല്ലങ്കിലും ഉച്ചയ്ക്ക് മഴപെയ്യുമ്പോൾ പാത്തിയിൽ കൂടി ഒഴുകിവരുന്ന മഴവെള്ളം തൂക്കുപാത്രത്തിൽ പിടിച്ച് പാത്രം കഴുകിയതും, മുറ്റത്തെ പ്ലാവിൽ ചുവട്ടിൽ പൂഴിമണ്ണ് വേരുകൾക്കിടയിലൂടെ ഇട്ട് 'മില്ല്' കളിച്ചതും , മുറ്റത്തെ ആൽമരത്തിൽ നിന്ന് വീണ ആലില എടുത്ത് മുറിച്ച് 'ആനയും കുതിരയും' കളിച്ചതും , ആലിൽകായ പെട്ടിച്ച് തിന്നുന്നതും, ചില ആലിൽക്കായിലെ പുഴുവിനെ (അറിയാതെ) വായിലിട്ട് ചവച്ച്തുടങ്ങുമ്പോൾ  രുചിവെത്യാസം കൊണ്ട് ആരും കാണാതെ ആലിൻകായ് തുപ്പിക്കളയുന്നതും ,  റോഡരികിലെ മതലിന്റെടുത്ത് നിന്ന് വല്ലപ്പോഴും പോകുന്ന വാഹനങ്ങൾ ചൂണ്ടിക്കാണിച്ചും നമ്പരു പറഞ്ഞ് സ്വന്തമാക്കുന്നതും ഒക്കെ അവ്യക്തമായ രൂപത്തോടെ മനസിൻ എവിടയോ മായാൻ കൂട്ടാതെ നിൽപ്പുണ്ട്...... ചാറ്റമഴയത്തെ 'പൂച്ചക്കണ്ണം' ഇടയ്ക്കിടയ്ക്ക് ഓർക്കാറുണ്ടങ്കിലും ചാട്ടത്തിൽ മാഞ്ഞുപോകുന്ന വരപോലെ ഓർമ്മകൾ മാഞ്ഞുതന്നെ നിൽക്കുന്നു...  മാഞ്ഞു തുടങ്ങിയ ആ ഓർമ്മകളെ നമുക്ക് വീണ്ടും തെളിയിച്ച് വരയ്ക്കാൻ പറ്റില്ലല്ലോ...... ഒന്നാം ക്ലാസ് മുതൽ നാലാം ക്ലാസ് വരെയാണ് ഞാൻ കൊച്ചു സ്കൂൾ എന്ന വാഴമുട്ടം ഗവണ്മെന്റ് എൽ.പി.സ്കൂളിൽ പഠിച്ചത് .....(ഒന്നാം ക്ലാസിന്റെ ഇടയ്ക്ക് മറ്റൊരു സ്കൂളിലേക്ക് പോയെങ്കിലും വീണ്ടും തിരിച്ചെത്തി)....

കൊച്ചുസ്കൂളിൽ പഠിക്കുന്ന സമയത്ത് ഒരു മഴക്കാലത്ത് സ്കൂൾ വിട്ടൂ  വരുമ്പോൾ വീടിനടുത്ത തോട്ടിൽ ഞാനും കൂട്ടുകാരനും ഒഴുക്കിൽ പെട്ടതാണ്.ഒരു ദിവസം സ്കൂൾ വിട്ടൂ വരുമ്പോൾ പെരും മഴ.മഴയൊക്കെ നനഞ്ഞ് രസിച്ചു പിള്ളാരെല്ലാവരും കൂടിയാണ് വരവ്.അന്ന് റോഡിൽ കൂടി മാത്രമേ സ്കൂളിൽ പോവുകയും വരികയും ചെയ്യാവൂ എന്ന് അലിഖിത നിയമം ഒന്നും ഇല്ലാത്തതുകൊണ്ട് വീടുകളുടെ മുറ്റത്ത് കൂടിയും പറമ്പിൽ കൂടിയൊക്കെയാണ് പോകൂം വരവും. കൂട്ടുകാരന്റെ വീട് തോടിന്റെ തൊട്ടടുത്താണ്. തോട് എന്ന് പറയുമ്പോൾ വലിയതൊന്നും അല്ല. തോടിന്റെ ഒരു കയ്യാലയിൽ നിന്ന് ചാടിയാൽ തോടിന്റെ അപ്പുറത്ത് അവന്റെ വീടിന്റെ പറമ്പിന്റെ കയ്യാലയിൽ എത്താം. പെരും മഴയത്ത് തോട് നിറഞ്ഞ് ഒഴുകുകയാണ്. തോട്ടിൽ നിന്ന് വെള്ളം പറമ്പിൽ എല്ലാം കയറിയിട്ടുണ്ട്. പതിവുപോലെ തോട് ചാടിക്കടക്കാം എന്ന് പറഞ്ഞ് ഞങ്ങളിൽ ആരോ ഒരാൾ തോടിന്റെ മറുകരയിലേക്ക് ചാടിയതും ചാട്ടം പിഴച്ച് തോട്ടിൽ വീണു. വീണവൻ തോട്ടിൽ ഒഴുക്കിൽ പെട്ട് ഒഴുകി തുടങ്ങിയതും അടുത്തവൻ അവനെ പിടിക്കാൻ കൂടെ ചാടി. രണ്ടുപേരും ഒഴുകി തുടങ്ങി. ഞങ്ങടെ നിലവിളി കേട്ട് കൂട്ടൂകാരന്റെ അച്ഛന്‍ വന്ന് ഞങ്ങളെ തോട്ടിൽ നിന്ന് വലിച്ചു കയറ്റി. 

2. അച്ചന്റെ സ്കൂൾ(നാഷ്ണൽ യു.പി.എസ് വാഴമുട്ടം)

നാലാം ക്ലാസിൽ നിന്ന് ജയിച്ച് അഞ്ചാം ക്ലാസിലേക്ക് പോയത് 'അച്ചന്റെ സ്കൂൾ' / 'തെക്കേ സ്കൂൾ' എന്നൊക്കെ വിളിക്കുന്ന വാഴമുട്ടം നാഷ്ണൽ യു.പി സ്കൂളീലേക്ക് ആയിരുന്നു. ആ സ്കൂളിന്റെ മാനേജർ ഒരച്ചൻ (ഉടയംകുഴിയിലെ അച്ചൻ) ആയിരുന്നതുകൊണ്ടാണ് ആ സ്കൂളിനെ അച്ചന്റെ സ്കൂൾ എന്ന് വിളിച്ചത്. (ഞങ്ങടെയൊക്കെ വീടിന്റെ തെക്കുഭാഗത്തായിരുന്നു ഈ സ്കൂൾ . അങ്ങനെ ഞങ്ങൾക്കത് തെക്കേ സ്കൂളായി. കൊച്ചു സ്കൂൾ വീടിന്റെ വടക്കുഭാഗത്ത് ആയിരുന്നതുകൊണ്ട് അത് വടക്കേ സ്കൂളും). പപ്പയായിരുന്നു ആ സ്കൂളിലെ ആദ്യ വിദ്യാർത്ഥി. അഞ്ചാം ക്ലാസിലായിരുന്നു ആദ്യമായി ഹിന്ദി (അക്ഷരങ്ങൾ) പഠിച്ചു തുടങ്ങുന്നത്. (ഇംഗ്ലീഷ് അക്ഷരങ്ങൾ പഠിക്കുന്നത് നാലിലും)... ഞാൻ എ ഡിവിഷനിൽ ആയിരുന്നു. ബി ഡിവിഷൻ സംസ്കൃതം പഠിക്കുന്നവരുടെ ആയിരുന്നു. ഉള്ള ഹിന്ദിയും ഇംഗ്ലീഷും തന്നെ നമ്മളെ സംബന്ധിച്ച് ബാലികേറാമലയായതുകൊണ്ട് സംസ്കൃതം ഉപേക്ഷിച്ച് എ ഡിവിഷനിൽ തന്നെ തുടർന്നു.... 

തെക്കേ സ്കൂളിലേക്ക് പോകുന്നതും വരുന്നതും ആയിരുന്നു രസകരം.... ഒരു കിലോ മീറ്റർ ദൂരമേ സ്കൂളിലേക്ക് ഉണ്ടായിരുന്നു എന്നുള്ളതെങ്കിലും സകൂളീലേക്ക് പോകാൻ പത്തമ്പത് വഴികൾ ഉണ്ടായിരുന്നു. ഇഷ്ടമുള്ള വഴികളിലൂടെ നമുക്ക് പോകാം. കണ്ടത്തിലൂടയും പാറയിലൂടയും ഒക്കെ നമുക്ക് സ്കൂളിൽ  പോകാം.... വലൈയ മഴക്കാലം ആയാൽ കണ്ടത്തിലേക്ക് ആറ്റിൽ നിന്ന് വെള്ളം കയറി വരും..... അതിങ്ങനെ പാടത്ത് നിറഞ്ഞ് കിടക്കുന്നത് കാണാൻ എന്ത് ഭംഗിയാണ്.?? പാടത്തിലൂടെ വെള്ളം നിറഞ്ഞ് ഒഴുകുന്നത് എത്ര കണ്ടാൽ ആണ് മതിയാവുന്നത്..... സ്കൂൾ മുറിയിൽ ലൈറ്റുകളൊന്നും ഇല്ല.... മഴക്കോളായാൽ ഇരുട്ടാവും... മഴ പെയ്ത് തുടങ്ങിയാൽ എറിച്ചിൽ അടിക്കാതിരിക്കാൻ ജനൽ അടയ്ക്കും... പിന്നെ ക്ലാസിൽ അരണ്ട വെളിച്ചം... ആ വെളിച്ചത്തിൽ കൊച്ചു വർത്തമാനങ്ങളുമായി അങ്ങ് കൂടും...... മഴപെയ്ത് തെന്നലായ പാറകളിലൂടെ ഓടിയിറങ്ങുന്നത് ആലോചിച്ചാൽ ഇപ്പോൾ ഒരു ഭയം തോന്നുമെങ്കിലും അന്നതൊക്കെ ഒരു ഹരം ആയിരുന്നു..... ആ കാലത്ത് ഇടയ്ക്കിടയ്ക്ക് വെള്ളപ്പൊക്കം ഉണ്ടാകുമായിരുന്നു.... മൂന്നാലു ദിവസം തോരാതെ മഴ പെയ്താൽ വെള്ളപ്പൊക്കം ഉറപ്പ്..... സ്കൂളിന് അവധിയാകണേ വെള്ളം കയറണേ എന്നൊക്കെ പ്രാർത്ഥിച്ചായിരിക്കണം അന്നൊക്കെ മഴക്കാലത്ത് സ്കൂളിലേക്ക് ഇറങ്ങിയിരുന്നത്......

3. നേതാജി ഹൈസ്കൂൾ , പ്രമാടം

മഴയുടെ സൗന്ദര്യം ശരിക്കും കണ്ടതും അനുഭവിച്ചതും ഹൈസ്ക്കൂൾ ക്ലാസിൽ എത്തിയപ്പോഴാണ്. സ്കൂളിലേക്കുള്ള വരവും പോക്കും രണ്ട് കിലോമീറ്റർ ദൂരം പാടത്തൂടെ ആയിരുന്നു. പൂട്ടിയവയലിലും നെല്ല് വളർന്ന വയലിലും ഉള്ള മഴ രണ്ട് അനുഭവങ്ങൾ ആയിരുന്നു. നോക്കത്താ ദൂരത്തോളം നെല്ല് വളർന്ന് നിൽക്കുന്ന വയലിലെ മഴകാണാൻ പ്രത്യേക ചന്തം തന്നെയാണ്. കാറ്റത്തും മഴയത്തും കൈത്തോടുകളിലെ വരമ്പുകളിലൂടെ പുസ്തകവുമായി ബാലൻസ് ചെയ്ത് നടക്കാൻ രസമാണ്. കാറ്റ് പലപ്പോഴും കുടയെ മടക്കി കളയും.കാറ്റിനെ വെല്ലുവിളിച്ച് കുടയെ പിടിക്കാൻ നോക്കിയാൽ ചിലപ്പോൾ ബാലസ് തെറ്റ് കൈത്തോട്ടിലോ കണ്ടത്തിലോ വീഴും.ഹൈസ്കൂളിൽ എത്തിയപ്പോൾ പുസ്തകവും ബുക്കും പ്ലാസ്റ്റിക കവറിലേക്ക് മാറ്റി. മഴയത്ത് അതാണ് സൗകര്യം. പുസ്തകം ഒക്കെ കവറിൽവെച്ച് റബർബാൻഡ് വലിച്ചിട്ട് അതിന്റെ മുകളിൽ ചോറ്റുപാത്രവും(വട്ടപാത്രം) വെച്ചാൽ പുസ്തകവും പാത്രവും കൈയ്യിലായി.

രാവിലത്തെ മഴയിൽ നനഞ്ഞ് കുതിർന്ന് ക്ലാസിൽ ചെന്നിരിക്കുമ്പോൾ ക്ലാസിലെ അരഭിത്തികളുടെ മുകളിലൂടെ വരുന്ന കാറ്റ് ശരീരത്തെ തണുപ്പിക്കും. കാന്തം കറുത്ത് മണ്ണിനെ പിടിക്കുന്നതുപോലെ ബഞ്ചിലിരിക്കുന്നവന്മാരെല്ലാം കൂടി ഈ കാറ്റ് അടിക്കുമ്പോൾ ഒട്ടിയിരിക്കും. ക്ലാസ് സമയത്ത് മഴയുടെ ഭംഗി കണ്ടത് പ്രമാടത്ത് ഹൈസ്കൂളിൽ പഠിച്ചപ്പോഴാണ്. ക്ലാസിൽ ഇരുന്നാൽ അരഭിത്തിക്ക് മുകളീലൂടെ നോക്കിയാൽ ചുറ്റിനും മഴപെയ്യുന്നത് കാണാം. സ്കൂളിനു പുറകുവശം വയലാണ്. (ഇപ്പോഴും അങ്ങനെയായിരിക്കണം). ഇടവേളകളിലും ഉച്ചസമയത്തും മഴപെയ്യുമ്പോൾ ആ പാടത്തേക്ക് നോക്കി നിൽക്കാൻ രസമാണ്. ഏറ്റവും രസം എപ്പോഴാണന്ന് അറിയാമോ? നെല്ല് കതിർ വന്നു തുടങ്ങുന്നതിനു മുമ്പ് പച്ചപ്പായി പടർന്ന് നിൽക്കുമ്പോൾ ചാറ്റമഴയുടെ അകമ്പടിയോടെ അടിക്കുന്ന കാറ്റ് മുഖത്തേക്ക് വീഴുന്ന മഴത്തുള്ളികൾ തുടച്ചുകൊണ്ട് ആ വയലിലേക്ക് നോക്കുമ്പോൾ.... നെല്ല് ഒരു 'വേവ്'(ചെറിയ തിരമാല) പോലെ ഇങ്ങനെ പൊങ്ങിയും താണും അനങ്ങും....

സ്കൂളിന്റെ പുറകിൽ, ഞങ്ങൾ പോവുകയും വരികയും ചെയ്യുന്ന പാടത്ത് വരമ്പ് കോരിവയ്ക്കുമെങ്കിലും മഴയത്ത് ആ വരമ്പൊക്കെ ഒഴുകിപ്പോകും. പിന്നെ മുട്ടറ്റം വെള്ളത്തിൽ നടന്നു കയറണം. മഴയുടെ ശക്തി കൂടിയാൽ വെള്ളത്തിന്റെ ഒഴുക്കും കൂടും. മുട്ടറ്റം വെള്ളം എന്നുള്ളത് മുകളിലേക്ക് കയറും. മുണ്ട് ഉടുത്തവന്മാർക്ക് മുണ്ട് പൊക്കി പൊക്കി മുണ്ടിനെ നനയാതെ സംരക്ഷിക്കാം. പാന്റാണങ്കിൽ നനഞ്ഞതുതന്നെ. വേണമെങ്കിൽ പാടത്തു നിന്ന് കുടകൊണ്ട് മീനിനെ പിടിച്ച് തൂക്കുപാത്രത്തിൽ ഇട്ട് അടൂത്ത തോട്ടിലോ അപ്പുറത്തുള്ള വയലിലോ കൊണ്ടിടാം....കാലിലേക്ക് മീനുകൾ വന്നു കൊത്തും. രണ്ട് ദിവസം നിർത്താതെ പെയ്ത മഴ ഒരു ദിവസം വിശ്രമം എടുക്കുമ്പോൾ വെള്ളം പളുങ്കുപൊലെ തെളിയും. ആ പളുങ്കുവെള്ളത്തിലൂടെ കുഞ്ഞു കുഞ്ഞു മീനുകൾ നമ്മളോട് കിന്നാരം പറഞ്ഞ് പോകും.

സ്കൂളിലേക്ക് പോകുന്ന വഴിയിൽ ഒരു തോട് കടക്കണം,അമ്മൂമ്മത്തൊട് . അമ്മൂമ്മത്തോട് കടക്കാൻ ഉണ്ടായിരുന്നത് ഒരു കോൺക്രീറ്റ് പോസ്റ്റ് ആയിരുന്നു. അതിലൂടെ തോട്ടിൽ വീഴാതെ ട്രിപ്പീസുകളിക്കാരനെപ്പോലെ ഞങ്ങൾ തോടു കടന്നു..... മഴ കനത്ത് പെയ്യുമ്പോൾ അമ്മൂമ്മത്തോട് നിറഞ്ഞു കവിഞ്ഞൊഴുകും... പോസ്റ്റിൽ നിന്ന് തോട്ടിലെ വെള്ളത്തിലേക്ക് കാലിട്ട് രസിച്ചു..... കർക്കിടകത്തിലായിരുന്നു ഈ യാത്രകൾ രസകരമാകുന്നത്..... നിറഞ്ഞൊഴുകുന്ന കൈത്തോടുകൾ, കതിർ നിറഞ്ഞു നിൽക്കുന്ന പാടങ്ങൾ , പെട്ടന്ന് ആകാശത്ത് നിറയുന്ന കാർമേഘങ്ങൾ..... ഇരച്ചെത്തുന്ന മഴ.... നനയുകയെ ള്ള്ളു മാർഗ്ഗം.... മഴ നനയാതിരിക്കാൻ ഒന്നുകിൽ തോട്ടിൽ നിൽക്കൂന്ന കാട്ടുചേമ്പിന്റെ ഇല പറിച്ച് തലയ്ക്ക് മുകളിൽ വെറുതെ പിടിക്കാം... അല്ലങ്കിൽ പോകുന്ന വഴിയിൽ കാണുന്ന വാഴയിൽ നിന്ന് വാഴ ഇല മുറിച്ച് തലയിൽ വീഴുന്ന മഴയെ തടയാം... പക്ഷേ മിക്കപ്പോഴും മഴയും കാറ്റും നമ്മളെ തോൽപ്പിക്കൂം.. കാറ്റും മഴയും നമ്മളെ കുളിപ്പിക്കും... പ്ലാസ്റ്റിക് കവറിലെ പുസ്തകങ്ങൾ എടൂത്ത് നമ്മൾ സുരക്ഷിതമാക്കാൻ ശ്രമിക്കും. ഉടുപ്പ് പൊക്കി പുസ്തക കവർ അരയിലേക്ക് ഇറക്കിവെയ്ക്കും.... ചുമ്മാ ഒരു വിശ്വാസത്തിനു മാത്രം.....

വലിയ മഴപെയ്യാതെ കാറ്റ് അടിച്ചുകൊണ്ട് ചാറ്റ മഴപ്പെയുമ്പോൾ ആൺപിള്ളാർ വരമ്പത്തോടെ ഓടൂമ്പോൾ (പാവം) പെൺകുട്ടികൾ കാറ്റിനോട് കലഹിക്കുകയായിരിക്കൂം. കള്ളക്കാറ്റ് അവരുടെ പാവാട കാറ്റ് അടുപ്പിച്ച് പറത്താൻ നോക്കൂം. ഒരു കൈകൊണ്ട് കാറ്റത്ത് പാവാട പൊങ്ങാതെ പിടിക്കണം മറുകൈകൊണ്ട് കുട പിടിക്കണം ഇതിൽ ഏതെങ്കിലും ഒരു കൈകൊണ്ട് പുസ്തകസഞ്ചിയോ കവറോ പിടിക്കണം. എന്നിട്ട് വേണം വരമ്പിലൂടെ ബാലൻസ് ചെയ്ത് നടക്കാൻ. വലിയ കാറ്റത്ത് കുടമടങ്ങാതയും നോക്കണം.... മാത്രമല്ല മഴയത്ത് ഓടുവരുന്ന കുരുത്തംകെട്ടവന്മാർക്ക് ഒറ്റവരമ്പിൽ വഴി കൊടുക്കുകയും വേണം....

മഴക്കാലത്തെ സ്കൂൾയാത്രകളിൽ പേടിപ്പെടുത്തുന്ന യാത്രകൾ ആയിരുന്നു തുലാം മഴ. സ്കൂൾ വിടൂന്നതിനു തൊട്ട് മുമ്പ് മഴക്കോൾ ആകാശത്ത് തയ്യാറാകും. പിന്നെ അങ്ങ് ആകാശത്ത് പൊരിഞ്ഞ പോരാട്ടമാണ്. ഇടിയും മിന്നലും ആകാശത്ത് നിറയുമ്പോൾ ഓരോ ഇടിയും നമ്മുടെ ചങ്കിൽ തറയ്ക്കും, ഓരോ മിന്നലും നമ്മൗടേ കണ്ണുകൾക്ക് മുമ്പിൽ  അഗ്നി ചിതറും.... വിശാലമായ പാടത്തിലെ വരമ്പിലൂടെ നടക്കുമ്പോൾ കൊള്ളിയാനുകൾ നമ്മുടെ തൊട്ടുമുമ്പിലേക്കിറങ്ങുന്നതായി നമുക്ക് തോന്നും. ആകാശത്ത് മിന്നൽപ്പിളരുകൾ ; ആകാശം പൊട്ടി വീണാൽ ആകാശത്തെ ചന്ദ്രനും സൂര്യനും ഒക്കെ താഴെ വീണാൽ എന്തുചെയ്യുമെന്ന് ചിന്തിച്ച് മിന്നൽ കാണാതിരിക്കാൻ തലകുനിച്ച് കുടയിലേക്ക് മാത്രമായി നമ്മൾ ചുരുങ്ങും.... ദേവന്മാരും അസുരന്മാരും യുദ്ധം ചെയ്യുമ്പോഴാണ് ഇടിയും മിന്നലും ഉണ്ടകുന്നെതെന്ന് വിശ്വസിച്ചിരുന്ന കാലം... ദൈവം മനുഷ്യരുടെ ഫോട്ടോ എടുക്കുന്നതാണ് മിന്നൽ എന്ന് ചുമ്മാ വിശ്വസിച്ചു.... ചുമ്മാതെയുള്ള ഇത്തരം വിശ്വാസങ്ങൾ ആയിരുന്നല്ലോ നമ്മുടെ ബാല്യകാലം. അതുകൊണ്ടാണല്ലോ അടികിട്ടാതിരിക്കാൻ പാഞ്ചിയില കൂട്ടികെട്ടിയിട്ട് സ്കൂളിൽ പോയതും , പാഞ്ചിയില പറിച്ച് കയ്യാലപ്പോട്ടിൽ വെച്ചതും......!!!!

തുലാം മഴക്കാലത്ത് ഉച്ചകഴിഞ്ഞുള്ള ക്ലാസുകൾ പലപ്പോഴും നടക്കാറീല്ല. മഴക്കോളായിക്കഴിഞ്ഞാൽ ക്ലാസിൽ ഇരുട്ടാവും. വേഴാമ്പലിനെ പോലെ ഞങ്ങൾ അവസാനത്തെ ബഞ്ചുകാർ (പത്താം ക്ലാസിൽ അവസാന ബഞ്ചിൽ എത്തപ്പെട്ടു) മഴയ്ക്കായി കാത്തിരിക്കും. കെട്ടിപൊക്കാത്ത ഭിത്തിക്ക് മുകളിലൂടെ മഴത്തുള്ളികൾ ഞങ്ങളിലേക്ക് വരും. അല്പം അഡ്ജസ്റ്റ് ചെയ്ത് മുന്നിലുള്ള ബഞ്ചിൽ നിന്ന് ഒന്നു രണ്ടുപേരെക്കൂടി ഞങ്ങടെ ബഞ്ചിൽ 'അക്കോമഡേറ്റ്' ചെയ്യും... പുറത്ത് മഴയുടെ താളം ക്ലാസ് മുറിക്ക് അകത്ത് കൊച്ചുകൊച്ചു കൗതുകങ്ങളുടേ മേളം....  ആ മഴസമയത്തായിരുന്നു സിനിമാക്കഥകൾ കേട്ടത്.... പുസ്തകത്തിൽ ഇടുന്ന കറുത്ത റബർ ചുരുട്ടി കോമ്പസുകൊണ്ട് കുരുക്കികുത്ത് കളിച്ചതും ആ മഴസമയത്ത് ആയിരുന്നു.... ഡസ്ക്കിൾ കോമ്പസുകൊണ്ട് വൃത്തം വരച്ച് മൂന്നുമൂലയും , ചതുരം വരച്ച് നാലുമൂല കളിച്ചതും ആ മഴസമയങ്ങളിലായിരുന്നു....... സൗഹൃദത്തിന്റെയും സന്തോഷത്തിന്റെയും ഒരുമയുടേയും മഴക്കാലമായിരുന്നു അത്...... പിന്നീട് ആ സൗഹൃദങ്ങളിൽ പലതും നഷ്ടപ്പെട്ടു.. തിരികെപിടിക്കാനാവത്തവിധം ആ ബന്ധങ്ങൾ ഒക്കെ നഷ്ടപ്പെട്ടിരിക്കുന്നു.... ജീവിത തിരക്കുകൾക്കിടയിൽ ഒരു ചിരിപോലും ചിരിക്കാനാവാതെ നഷ്ടപ്പെട്ട് പോകുന്ന ബന്ധങ്ങളിൽ ഒന്നുമാത്രമായി മാറുകയാണ് ആ മഴഓർമ്മകളും... എത്ര നാളുകൾ കൂടി ഇനി ഈ ഓർമ്മകൾ ഉണ്ടാകുമെന്ന് അറിയില്ല....

മഴകൊണ്ടുമാത്രം മുളയ്‌ക്കുന്ന വിത്തുകള്‍

ചിലതുണ്ട്‌ മണ്ണിന്‍ മനസില്‍  ...... 

അന്ന് നഷ്ടപ്പെട്ട സൗഹൃദങ്ങൾ മുളയ്ക്കുന്ന മഴക്കാലത്തിനായി കാത്തിരിക്കുകയാണ്..... എന്ന്നെകിലും ആ സൗഹൃദവിത്തുകൾ മുളയ്ക്കാത്തിരിക്കില്ല എന്ന പ്രതീക്ഷകൾ  ഇപ്പോഴും ക്ലാവ്പിടിച്ച് നിറം മങ്ങിയ ഓർമ്മകളിൽ ചെമ്പ് തെളിയുന്നതും കാത്തിരിക്കുകയാണ്..........

'ഒരുവട്ടം കൂടിയെൻ ഓർമ്മകൾ മേയുന്ന തിരുമുറ്റത്തെത്തുമ്പോൾ'....

ഇന്നലെ(ജൂൺ ഒന്ന്) വീണ്ടും ആ പഴയ കൊച്ചുസ്കൂളിൽ യാദൃശ്ചികമായി പോകേണ്ടിവന്നു... പോയി എന്നതിനെക്കാൾ സ്കൂൾ പ്രവേശനോത്സവത്തോട് അനുബന്ധിച്ചുള്ള പരിപാടിയിലും പങ്കെടുത്തു. ഇപ്പോഴും ഒരു മാറ്റവും ഇല്ലാത്ത സ്കൂൾ കെട്ടിടം. പക്ഷേ പഴയതിനെക്കാൾ മനോഹരമായിരിക്കുന്നു.... പണ്ട് ഒന്നാം ക്ലാസിൽ ഇരുന്ന ക്ലാസിന്റെ കോണിൽ ഒരു കസേരയിട്ട് ഇരുന്ന് ആ പരിപാടിയിൽ പങ്കെടുത്തു... ആ ജനലുകൾ ഇപ്പോഴും പഴയതുപോലെ തന്നെ... അന്ന് ഇടവേളകളിൽ ജനലിൽ കൂടി ചാടി(പ്പോ)യാൽ സാറുന്മാരുടെ അടി ഉറപ്പായിരുന്നു. അന്നത്തെ ബഞ്ചുകൾ തിരഞ്ഞു എങ്കിലും കണ്ടില്ല... എപ്പോഴും കുറുകികൊണ്ടിരുന്ന പ്രാവുകളെയും കണ്ടില്ല.... ഇടയ്ക്ക് സ്കൂൾ മുറ്റത്തേക്കിറങ്ങി..... ഇല്ല മുറ്റത്തിനൊരു മാറ്റവും ഇല്ല..... (ഊഞ്ഞാലും കുട്ടികൾക്ക് കറങ്ങാനുള്ള ഒരു നിർമ്മ്തയും അധികത്തിൽ മുറ്റത്തുണ്ട്). മുറ്റത്തെ പ്ലാവും ആലും ഇപ്പോഴും ഉണ്ട്.... മതിൽ പൊക്കി കെട്ടിയിരിക്കുന്നു.... ആലിനു ചുറ്റും ചുറ്റുമതിൽ ഉണ്ടാക്കിയിരിക്കുന്നു... പണ്ട് മണ്ണിട്ട് മില്ല് കളിച്ചിരുന്ന പ്ലാവുകൾക്ക് ചുറ്റും എന്തക്കയോ ചെടികളും പച്ചക്കറികളും നട്ടിരിക്കൂന്നു.... മുറ്റത്തെ നെല്ലിമരം അവിടെയുണ്ട് (പണ്ടത്തെ നെല്ലിതന്നെയാണോ എന്നുറപ്പില്ല).... കിണറിനു ചുറ്റും ചെടികൾ വെച്ചിരിക്കുന്നു. ഇപ്പോൾ മോട്ടോർ വെച്ചിരിക്കുന്നതുകൊണ്ട് വെള്ളം കോരേണ്ട എന്ന് തോന്നുന്നു...  മൂന്നും നാലും ക്ലാസിൽ പഠിക്കൂന്ന കുട്ടികളായിരുന്നു കൊച്ചു കുട്ടികൾക്ക് വെള്ളം കോരിക്കൊടൂത്തിരുന്നത്.... 

മുറ്റത്തൂടെ നടന്നപ്പോഴാണ് ചിതലെടുത്തു തുടങ്ങിയ മങ്ങിയ ഒരു ഫോട്ടോ അനാഥമായി കിടക്കൂന്നത് ശ്രദ്ധിച്ചത്... ആ ഫോട്ടോയിലേക്ക് ശ്രദ്ധിച്ചു നോക്കി. പരിചിതമായിരുന്ന മുഖങ്ങൾ ഓർമ്മകളിൽ നിന്ന് തെളിഞ്ഞു വരുന്നു..ഞാൻ പഠിച്ച സമയത്തെ ഒരു ഫോട്ടോയാണത്. അന്നത്തെ അദ്ധ്യാപകരുടെ ഫോട്ടോ. കുട്ടികൾക്ക് ഭക്ഷണം തയ്യാറാക്കി കൊടുത്തിരുന്ന തോമ്മാച്ചായൻ പിരിഞ്ഞു പോകുന്ന ദിവസം എടൂത്ത ഫോട്ടോ!!!! ഉപ്പുമാവിന് വട്ടയിലയുമായി നില്ല ഒരു കാലത്തിന്റെ നിറം മങ്ങിയ ചിത്രങ്ങൾ തെളിയുകയാണ്. പക്ഷേ.......

ഇരിക്കുന്നവർ > സുകുമാരൻ സർ , ഭാസ്ക്കരൻ സർ, തോമാച്ചാൻ , രാമചന്ദ്രൻ സർ, ഗോപി സർ
നിൽക്കുന്നവർ >> മറിയാമ്മ ടീച്ചർ , ഗോമതി ടീച്ചർ , ഏലിയാമ്മ ടീച്ചർ

ആ ചിത്രങ്ങളിൽ ഉള്ള രണ്ടുപേരെ എത്ര ഓർത്തെടൂക്കാൻ ശ്രമിച്ചിട്ടും പരാജയപ്പെട്ടു. ഗോപിസാറും രാമചന്ദ്രൻസാറും സുകുമാരൻസാറും ഏലിയാമ്മ ടീച്ചറും മറിയാമ്മ ടീച്ചറും  ഓർമ്മയിൽ തന്നെയുണ്ട്. ഗോമതിടീച്ചറെക്കുറിച്ചുള്ള ഓർമ്മകൾ ഒന്നും മനസിൽ തെളിയാതിരുന്നതുകൊണ്ട് അത് ആരാണന്ന് അറിയാൻ മറ്റൊരാളിന്റെ സഹായം വേണ്ടീ വന്നു... ഈ ഫോട്ടോ കണ്ടപ്പോഴാണ് പഴയകാലത്തെക്കുറിച്ച് ഓർത്തതും എഴുതിയതും..... (സുകുമാരൻ സാറിനെക്കുറിച്ച് ഇപ്പോഴും ഓർമ്മയുണ്ട്. റോഡിൽ നിന്ന് മുറുക്കിതുപ്പി വായനശാലകടന്ന് കയറി വായിൽ വെള്ളം ഒഴിച്ച് നീട്ടിത്തുപ്പുന്ന ഒരു രൂപം. എന്തുകൊണ്ട് അതിപ്പോഴും മായാതെ നിൽക്കുന്നു എന്നറിയില്ല. അദ്ദേഹമാണ് പുരാണത്തിലെ കഥകൾ പറഞ്ഞ് തന്നത്. ബ്ലാക്ക് ബോർഡിൽ  ശ്ളോകങ്ങൾ എഴുതിയിട്ട് ആ കഥകൾ ഒക്കെ പറഞ്ഞ് തന്നത് സുകുമാരൻ സാർ ആയിരുന്നു.)

മറവിയാണ് മനുഷ്യന്റെ അനുഗ്രഹം എന്ന് പറഞ്ഞ് കേട്ടിട്ടുണ്ട്. പക്ഷേ ആ ഒരൊറ്റ ഫോട്ടോ കൊണ്ട് മറവിയിലേക്ക് ഒഴുകിക്കോണ്ടൊരുന്ന ചില ഓർമ്മകളെ വീണ്ടും പുതുക്കിയെടുക്കാൻ കഴിഞ്ഞു..... ഓ‌എൻവിയുടെ പ്രശസ്തമായ കവിതയോടെ അവസാനിപ്പിക്കാം...

ഒരു വട്ടം കൂടിയെന്നോര്‍മകള്‍ മേയുന്ന

തിരുമുറ്റത്തെത്തുവാന്‍ മോഹം

തിരുമുറ്റത്തൊരു കോണില്‍ നില്‍ക്കുന്നൊരാനെല്ലി

മരമൊന്നുലുത്തുവാന്‍ മോഹം.

അടരുന്ന കായ്മണികള്‍ പൊഴിയുമ്പോള്‍

ചെന്നെടുത്ത്‌ അതിലൊന്നു തിന്നുവാന്‍ മോഹം

സുഖമെഴും കയ്പ്പും പുളിപ്പും മധുരവും

നുകരുവാനിപ്പോഴും മോഹം

തൊടിയിലെ കിണര്‍വെള്ളം കോരിക്കുടിച്ചെന്തു

മധുരമെന്നോതുവാന്‍ മോഹം

എന്തു മധുരമെന്നോതുവാന്‍ മോഹം

നാസയുടെ ചിത്രവും ഇന്ത്യയിലെ വെളിച്ചവും

കഴിഞ്ഞ ദിവസം(25-Sep-2017) പ്രധാനമന്ത്രി തന്റെ പ്രസംഗത്തിൽ നാസ പുറത്തു വിട്ട ഇന്ത്യയുടെ 2012 ലേയും 2016 ലേയും ഉപഗ്രഹ ചിത്രങ്ങളെക്കുറിച്ച് പറഞ്ഞിരുന്നല്ലോ... നാസ പുറത്തുവിട്ട ചിത്രങ്ങൾ എന്ന പേരിൽ പല ചിത്രങ്ങളും നമുക്ക് പലപ്പോഴും കിട്ടാറുണ്ട്. ആ ചിത്രങ്ങളിലെ വാസ്തവം എന്താണന്ന് നമ്മൾ പലപ്പോഴും ചിന്തിക്കാതെ തന്നെ മറ്റുള്ളവർക്ക് കൂടി നൽകുകയാണ് പതിവ്. പ്രധാനമന്ത്രി പറഞ്ഞത് നാസ പുറത്തുവിട്ട 2012 , 2016 ലെ ഇന്ത്യയിലെ ചിത്രങ്ങൾ നോക്കിയാൽ ഇന്ത്യയുടെ വൈദ്യുതീകരണത്തിന്റെ വളർച്ച അറിയാം എന്നാണ്...

picture :: https://worldview.earthdata.nasa.gov/ 

വൈദ്യുതീകരണത്തിന്റെ കാര്യം അവിടെ നിൽക്കട്ടെ. നമുക്ക് നാസയുടെ ചിത്രത്തെ നോക്കാം. പതിവുപോലെ നമ്മൾ ആദ്യം ചിന്തിക്കുന്നത് നാസ ഇന്ത്യയുടെ ഇങ്ങനെയൊരു ചിത്രം പുറത്തുവിട്ടിട്ടുണ്ടോ എന്നാണ്. നാസ ഇന്ത്യയുടെ മാത്രമല്ല ലോകത്തിന്റെ 'രാത്രികാല' ചിത്രങ്ങൾ പുറത്തു വിട്ടിട്ടുണ്ട്. NASA - worldview എന്ന സൈറ്റിൽ നിന്ന് നമുക്ക് ഈ ചിത്രങ്ങൾ കാണാവുന്നതാണ്.  

ഈ സൈറ്റിലെ ഹോം പേജിലെ +Add Layers ൽ ക്ലിക്ക് ചെയ്യുമ്പോൾ കിട്ടുന്ന വിൻഡോയിലെ  Hazards And Disasters വിഭാഗത്തിൽ Other എന്ന സബ്മെനുവിൽ നിന്ന് Earth at Night ക്ലിക്ക് ചെയ്യുക. (Fires എന്ന സബ്മെനുവിൽ നിന്നും Earth at Night സെലക്റ്റ് ചെയ്യാവുന്നതാണ്. അല്ലങ്കിൽ സേർച്ച് ബോക്സിൽ Earth at Night എന്ന് കൊടുത്ത് സേർച്ച് ചെയ്തെടുക്കാവുന്നതാണ്). 

താഴെ കാണുന്ന രീതിയിലുള്ള ഒരു പോപ്-അപ് വിൻഡോയിൽ നാല് ചെക്ബോക്സുകളിലായി നാല് ലെയറുകൾ കൂടി ഉൾപ്പെട്ടിട്ടുണ്ടാവും. അവയിൽ നമുക്കാവിശ്യമുള്ള മൂന്ന് ലെയറുകൾ സെലക്റ്റ്ചെയ്തതിനു ശേഷം പോപ്‌അപ് വിൻഡോ ക്ലോസ് ചെയ്യുക.

ഈ മൂന്ന് ഓപ്ഷനുകളും ലെയറുകളിൽ കൂടിച്ചെർന്നിട്ടുണ്ടാവും.  (ചിത്രം നോക്കുക)

Black Marble- Nighttime Lights only (Annual , 2012&2016) - OVERLAYS

Black Marble- (Annual , 2012&2016) - BASE LAYERS

Earth at Night 2012 - BASE LAYERS 

ഈ ലെയറുകളിൽ ക്ലിക്ക് ചെയ്ത് നമുക്ക് ലോകത്തെ കാണാവുന്നതാണ്. ആ ലെയറുകളുടെ(കാഴ്ചകളുടെ) വിവരണം ആ ലെയറുകളുടെ ഭാഗത്ത് തന്നെയുള്ള ഐക്കണിൽ ക്ലിക്ക് വായിക്കാവുന്നതാണ്. Earth at Night 2012 മാത്രമേ നമുക്ക് ഹോം‌പേജിലെ ഡിഫോൾട്ട് ഡേറ്റിൽ കാണാൻ സാധിക്കൂ. (Black Marble ലെയർ ന്റെ ഭാഗത്ത് 'ഷോ ലെയർ/ഹൈഡ് ലെയർ' എന്നുള്ളതിൽ(കണ്ണ് തുറന്നതും അടച്ചതുമായ സിമ്പൽ) 'നോ ആക്ഷൻ' സിമ്പൽ ആണ് ഉള്ളത്). Place Labels,Coastlines/Boarders/Roads ,Coastlines ലയറുകൾ 'Show Layer' ആക്കിയാൽ (കണ്ണ് തുറന്നിരിക്കുന്ന സിമ്പലാക്കിയാൽ) ഓരോ രാജ്യത്തിന്റെയും പേരും അതിർത്തിയും ഡിസ്പ്ലേ ആകും.

black marble ലെയറുകൾ നമുക്ക് കാണണമെങ്കിൽ ലെയറുകളുടെ താഴെയുള്ള ഡേറ്റിലെ വർഷം 2012 ഓ 2016 ഓ ആക്കണം. (ഇയറിന്റെ മുകളിലേക്ക് കർസർ കൊണ്ടുപോയാൽ അപ്-ഡൗൺ ആരോ തെളിയും. അതിലേ ഡൗൺ ആരോ ഉപയോഗിച്ച് വർഷം മാറ്റാം അല്ലങ്കിൽ വർഷം ടൈപ്പ് ചെയ്ത് നൽകിയതിനുശേഷം സെലക്ഷൻ മാറ്റുക). 

(ലെയറുകൾ ഹൈഡും ഷോയും ചെയ്ത് ഭൂമിയെ കാണുക.- സമയം ഉണ്ടങ്കിൽ മറ്റ് ലെയറുകൾ കൂടി ആഡ് ചെയ്ത് ഭൂമിയേയും ഇന്ത്യയേയും കണ്ട് കണ്ട് ഇരിക്കുക)

::: നിങ്ങൾക്ക് വായിക്കാൻ സമയം ഉണ്ടങ്കിൽ നാസയുടെ തന്നെ earthobservatory  വായിക്കുക:::

https://earthobservatory.nasa.gov/Features/NightLights/ 

https://earthobservatory.nasa.gov/NaturalHazards/view.php?id=90008

https://earthobservatory.nasa.gov/Features/?eocn=topnav&eoci=features

https://earthobservatory.nasa.gov/Features/NightLights/page3.php

https://earthobservatory.nasa.gov/ ലെ Features മെനുവിൽ നിന്ന് 1998 മുതലുള്ള ലേഖനങ്ങൾ വായിക്കാം.

ഇനിയും ചിലവഴിക്കാൻ നിങ്ങളുടെ കൈയ്യിൽ സമയം ഉണ്ടങ്കിൽ നാസയുടെ തന്നെ വിസിബിൾ എർത്ത് എന്ന സൈറ്റിൽ  ചിലവഴിക്കാം.

asia_vir_2016:: https://visibleearth.nasa.gov/view.php?id=90008

ഇന്ത്യ-പാക്കിസ്ഥാൻ അതിർത്തിയൊക്കെ ഉൾപ്പെടെയുള്ള ഇന്ത്യയിലെ ചിത്രങ്ങൾ വിസിബിൾ എർത്തിൽ ഉണ്ട്. 

https://visibleearth.nasa.gov/view.php?id=86725

:: അടിക്കുറിപ്പ് ::

നാസയുടെ ഇന്ത്യൻ ചിത്രം മനസിലാക്കിയ സ്ഥിതിക്ക് ഇന്ത്യയിലെ വൈദ്യുതീകരണത്തിന്റെ കണക്ക് കൂടി അറിഞ്ഞാൽ കൊള്ളാം എന്ന് തോന്നുണ്ടോ? അതിനും വഴിയുണ്ട്. CENTRAL ELECTRICITY AUTHORITY യുടെ വൈബ്സറ്റിൽ നിന്ന് 2012 മുതലുള്ള വൈദ്യുതീകരണത്തിന്റെ കണക്ക് കിട്ടും. 

:: ഇനി ഒരു സംശയം കൂടി ഇല്ലേ? ::

2012 മുതൽ തന്നെ എല്ലാ ഗ്രാമങ്ങളിലും വൈദ്യുതി എത്തിയിട്ടും (100%) നാസയുടെ പടത്തിൽ എന്താ നമ്മുടെ കേരളത്തിൽ വെട്ടം ഇല്ലാത്തത്.? 

 - എല്ലാ ഇലക്ട്രിക് പോസ്റ്റിലും രാത്രിയിൽ ലൈറ്റ് കത്തിക്കണം☺☺ 

ദേശാഭിമാനിയുടെ അത്ഭുത കണ്ടെത്തൽ :: 823 വർഷത്തിലൊരിക്കലെ അപൂർവത

2017 ജൂലൈ 24 തിങ്കൾ ദേശാഭിമാനിയുടെ കോട്ടയം എഡീഷനിലെ അവസാന പേജിലെ ഒരു ബോക്സ് വാർത്തയാണ് താഴെ. ജൂലൈ മാസത്തെക്കുറിച്ചുള്ള ഒരു കണ്ടെത്തലാണത്. 

ഒരു മാസത്തിലെ ദിവസങ്ങളുടെ സമാനതകൊണ്ട് ജൂലൈ ശ്രദ്ധേയം. ശനിയും, ഞായറും , തിങ്കളും അഞ്ച് ദിവസങ്ങൾ വീതമുണ്ട് ഈ മാസം. 

   823 വർഷം കൂടുമ്പോഴാണ് കലണ്ടറിൽ ഈ ഒരത്ഭുതം കാണാനാവുക. ഇതിനുമുമ്പ് 1194 ലാണ് ഇങ്ങനെ അടുത്തടുത്തുള്ള ഈ മൂന്നു ദിവസങ്ങളും അഞ്ചുവീതം രേഖപ്പെടൂത്തിയിട്ടുള്ളത്. അതായത് ക്രിസ്തുവർഷാരംഭം മുതൽ ഇതുവരെ രണ്ടുതവണയേ ഇങ്ങനെ കലണ്ടറിൽ കാണാൻ കഴിഞ്ഞിട്ടുള്ളു. ഇനി ഇങ്ങനെ വരുന്നത് 2840 ൽ. 

ഏതോ വാട്സാപ്പ് മെസേജ് ഒന്നു നോക്കുകപോലും ചെയ്യാതെ വാർത്തയായി പത്രത്തിൽ കയറിക്കൂടിയതാവാനാണ് സാധ്യത. വാട്സാപ്പ് വ്യാജമെസേജുകൾ ഇനി നമുക്ക് അത്ഭുതകണ്ടെത്തലുകളായി പത്രങ്ങൾ വഴി ആധികാരിക കണ്ടെത്തലുകളായി നമ്മുടെ മുന്നിൽ എത്തുമെന്ന് ഉറപ്പാണ്. 

ഇനി നമുക്ക് ഈ അത്ഭുത വാർത്തയിലെ ഓരോ വാചകങ്ങളിലേയും ( 6 വാചകങ്ങളേ ഉള്ളൂ) സത്യം എന്തെന്ന് നോക്കാം.

ഒന്നും രണ്ടും വാചകങ്ങളുടെ ചുരുക്കം ഇതാണ്; 2017 ജൂലൈയിൽ ശനി , ഞായർ , തിങ്കൾ അഞ്ച് ദിവസങ്ങൾ വീതം ഉണ്ട്. ഇതാണ് അത്ഭുതം.  ശനി , ഞായർ , തിങ്കൾ അഞ്ച് ദിവസങ്ങൾ വീതം വരുന്നതാണോ അത്ഭുതം? 2016 ഒക്ടോബറിനും 2018 ഡിസംബറിനും ശനി, ഞായർ , തിങ്കൾ ദിവസങ്ങൾ 5 വീതം ഉണ്ട്.

ജൂലൈ മാസത്തിന്റെ കാര്യം മാത്രമാണ് ദേശാഭിമാനി പറയുന്നതെന്ന് കരുതുക. ഇതിനുമുമ്പ് 1194 ലാണ് ഇങ്ങനെ അടുത്തടുത്തുള്ള ഈ മൂന്നു ദിവസങ്ങളും അഞ്ചുവീതം രേഖപ്പെടൂത്തിയിട്ടുള്ളത്  എന്ന് കണ്ടെത്തൽ പറയുന്നു. 

2006 ലെ ജൂലൈമാസം നോക്കുക.... 2006 ജൂലൈയ്ക്കും ശനി , ഞായർ , തിങ്കൾ അഞ്ച് വീതം ഉണ്ട്

ഇനി ഇങ്ങനെ വരുന്നത് (ശനി , ഞായർ, തിങ്കൾ അഞ്ച് ദിവസങ്ങൾ വീതം വരുന്നത്) ഇനി 2840 ൽ ആണന്നാണ് ദേശാഭിമാനി പറയുന്നത്.....

2023 ലെ ജൂലൈ മാസം നോക്കുക.  2023 ജൂലൈയ്ക്കും ശനി , ഞായർ , തിങ്കൾ അഞ്ച് വീതം ഉണ്ട്

ശനി , ഞായർ, തിങ്കൾ അഞ്ച് ദിവസങ്ങൾ വീതം വരുന്നത് 2017 നു മുമ്പ് 1194 ൽ ആയിരുന്നു എന്നാണ് പറയുന്നത്. നമുക്കിനി 1194 ലെ ജൂലൈമാസം ഒന്ന് നോക്കാം....

1194 ലെ ജൂലൈ മാസത്തിൽ വെള്ളി , ശനി , ഞായർ ദിവസങ്ങളാണ് അഞ്ച് വീതം ഉള്ളത്. 

ശനി , ഞായർ, തിങ്കൾ അഞ്ച് ദിവസങ്ങൾ വീതം വരുന്നത് 2017 നു ശേഷം 2840 ൽ ആണന്നാണ് വാർത്തയിൽ പറയുന്നത്. നമുക്കിനി 2840 ലെ ജൂലൈ കൂടി നോക്കാം

ക്രിസ്തുവർഷാരംഭത്തിനു ശേഷം ഇതുവരെ രണ്ട് തവണമാത്രം സംഭവിച്ച ; 823 വർഷത്തിലെ അപൂർവത നമുക്കൊന്ന് കൂടി നോക്കാം.... 

ചുരുക്കിപ്പറഞ്ഞാൽ ദേശാഭിമാനിയിലെ ആ വാർത്തയിലെ അപൂർവതയും അത്ഭുതവും 'വാട്സാപ്പ് ഫോർവേഡ്' അത്ഭുതവും അപൂർവതയും മാത്രമാണ്. 

നമുക്കിനി വെള്ളത്തിനായി ക്യു നിൽക്കാം.... മഴ ചതിച്ചാശാനേ

നവംബർ തുടങ്ങുന്നതിനു മുമ്പ് തന്നെ നമ്മുടെ സംസ്ഥാനം വരൾചാബാധിതപ്രദേശമായി പ്രഖ്യാപിക്കപ്പെട്ടു. അതായത് മഴ ലഭിക്കേണ്ട സമയത്ത്, തുലാമഴസമയത്ത് തന്നെ (വടക്ക്‌ കിഴക്കൻ മൺസൂൺ) നമ്മുടെ സംസ്ഥാനം വരൾചയുടെ പിടിയിൽ അകപ്പെട്ടിരിക്കൂന്നു. ഇടവപ്പാതിക്ക് (തെക്ക്‌ പടിഞ്ഞാറൻ മൺസൂൺ) പിന്നാലെ തുലാമഴയും പെയ്യാതെ നിന്നപ്പോൾ ജലസ്രോതസുകൾ വറ്റിതുടങ്ങിയിരിക്കുന്നു. അടുത്ത ഇടവപ്പാതിക്ക് ഇനി ഏഴ് മാസങ്ങൾ കൂടി ബാക്കിയുണ്ട്. വേനൽമഴ കൂടി കനിഞ്ഞില്ലങ്കിൽ നമ്മൾ ഇനി വെള്ളത്തിനായി ക്യു നിൽക്കേണ്ടിവരും. അപ്പോഴും വലിയ ഒരു പ്രശ്നമുണ്ട്. ക്യു നിന്ന് വാങ്ങാനാണങ്കിലും വെള്ളം എവിടെ നിന്ന് കിട്ടും??? മഴയുടേ വാർഷിക ശരാശരി 3000 ആയിരുന്ന ഒരു സംസ്ഥാനം ആണ് ഇപ്പോൾ വെള്ളത്തിനായി മഴമേഘങ്ങൾക്കായി കാത്തിരിക്കൂന്നത്.

മഴ ചതിച്ചാശാനേ......

രണ്ട് പ്രധാന മഴക്കാലങ്ങൾ, ജൂൺ മുതൽ സെപ്റ്റംബർ വരെ നീണ്ടു നിൽക്കൂന്ന ഇടവപ്പാതി അതായത്‌ തെക്ക്‌ പടിഞ്ഞാറൻ മൺസൂൺ(South-West monsoon.). ഒക്ടോബർ മുതൽ ഡിസംബർ വരെ നീണ്ടു നിൽക്കുന്ന തുലാമഴയിലും. (വടക്ക്‌ കിഴക്കൻ മൺസൂൺ). പിന്നെ ജനുവരി മുതൽ മെയ് വരെ യുള്ള കാലങ്ങളിലുള്ള വേനൽ മഴ. ഇങ്ങനെ ഒരു 'മഴചക്ര'ത്തിലൂടേയായിരുന്നു നമ്മൾ കടന്നു പോയിരുന്നത്.

ഇടവപ്പാതി.

മഴയുടെ വാർഷിക ശരാശരിയായ 3000mm ൽ(വാർഷിക ശരാശരി - 3,055) ഭൂരിഭാഗവും-(70%) നമുക്ക് കിട്ടിയിരുന്നത് ഇടവപ്പാതിയിൽ നിന്നായിരുന്നു. (കാലാവസ്ഥ നിരീക്ഷണവകുപ്പിന്റെ കണക്കനുസരിച്ച് കേരളത്തിന്റെ മഴയുടെ വാർഷിക ശരാശരി 2924.3മി.മി ) .2016 ലെ ഇടവപ്പാതി കഴിഞ്ഞപ്പോൾ കേരളത്തിൽ ലഭിച്ചത് 1352.3mm മഴയാണ്. കിട്ടേണ്ടിയിരുന്നത് 2039.7mm. 34 ശതമാനത്തിന്റെ കുറവ്. 20 ദിവസം മാത്രമാണ് ശരാശരിയിൽ കൂടുതൽ മഴ ലഭിച്ചത്. ബാക്കി ദിവസങ്ങളിൽ മഴയുടേ അളവ് കുറവായിരുന്നു.

കേരളത്തിലെ എല്ലാ ജില്ലകളിലും ഇടവപ്പാതി കുറവായിരുന്നു. ഏറ്റവും കൂടുതൽ മഴ ലഭിച്ച കാസർകോട്ടു(2252.9) 25% മഴ കുറവായിരുന്നു. വയനാട് ജില്ലയിൽ 59 ശതമാനത്തിന്റെ മഴക്കുറവായിരുന്നു ഇടവപ്പാതിയിൽ .

പട്ടിക നോക്കുക.

ഇടവപ്പാതി മാത്രമല്ല തുലാമഴയും ചതിച്ചു....

ഒക്ടോബരിൽ(2016 ഒക്ടോബർ1) ആരംഭിച്ച തുലാമഴയും ഇതുവരെയുള്ള കണക്കുകൾ വെച്ച് വളരെക്കുറവായിരുന്നു. കേരളത്തിലാകെ 63 ശതമാനത്തിന്റെ മഴക്കുറവാണ് ഇതുവരെ(2016 നവംബർ 30വരെ) രേഖപ്പെടൂത്തിയിരിക്കൂന്നത്. ഏറ്റവും കൂടുതൽ മഴക്കുറവ് അനുഭവപ്പെട്ടത് കാസർകോട്ടാണ്. 86 ശതമാനത്തിന്റെ മഴക്കൂറവാണ് ഇവിടെ രേഖപ്പെടുത്തിയത്. ഏറ്റവും കുറവ് മഴക്കുറവ് പത്തനംതിട്ട ജില്ലയിലും. പത്തനംതിട്ടയിൽ 27 ശതമാനമാണ് മഴക്കുറവ്. പട്ടിക നോക്കുക.

(മുകളിലെ പട്ടിക ജനുവരി2017ൽ അപ്ഡേറ്റ് ചെയ്തത്)

2015 ലെ തുലാമഴ കേരളത്തിൽ 27 ശതമാനം അധികം കിട്ടിയിരുന്നു. 480.7 കിട്ടേണ്ടിയിരുന്നിടത്ത് 610.1മി.മി മഴ കിട്ടിയിരുന്നു.
പട്ടിക നോക്കുക

2016 ലെ വേനൽ മഴയും നമ്മളെ ചതിച്ചതാ!!!!!

പട്ടിക നോക്കുക.

2016 ലെ വേനൽമഴയിൽ കേരളത്തിൽ ആകെ 21 ശതമാനത്തിന്റെ മഴക്കുറവാണ് ഉണ്ടായത്. നാല് ജില്ലകൾ ഒഴികെ മറ്റ് ജില്ലകളിൽ മഴ പ്രതീക്ഷിച്ച അളവിൽ ലഭിച്ചില്ല എന്ന് മാത്രമല്ല പത്തനംതിട്ട പാലക്കാട് ജില്ലകളിൽ 90 ശതമാനത്തിലധികം മഴകുറഞ്ഞു. ഇതിൽ പത്തനംതിട്ട ജില്ലയിൽ 65മി.മീ മഴലഭിക്കേണ്ട സ്ഥാനത്ത് ലഭിച്ചത് 5 ശതമാനം മാത്രം.

ഇന്ത്യയിൽ മൺസൂൺ മഴക്കൂറവ് കേരളത്തിൽ...

India Meteorological Department ന്റെ 2016 Southwest Monsoon End of Season Report പ്രകാരം 2016 ലെ തെക്ക്‌ പടിഞ്ഞാറൻ മൺസൂൺ(ഇടവപ്പാതി) കാലത്ത് ഇന്ത്യയിൽ ഏറ്റവും കുറവ് മഴ ലഭിച്ചത് കേരളത്തിലാണ്. 2039.6മി.മി കിട്ടേണ്ട സ്ഥാനത്ത് 1352.2മി.മി മഴയാണ് നമുക്ക് ലഭിച്ചത്. ഇന്ത്യയിലാകമാനം ഈ കാലയളവിൽ ലഭിക്കേണ്ട മഴയിൽ 97% ലഭിച്ചപ്പോഴാണ് കേരളത്തിൽ 34 ശതമാനത്തിന്റെ കുറവ്. 30 ശതമാനം മഴക്കുറവുമായി ആസാമും മേഘാലയും ഉൾപ്പെട്ട മെട്രോളജിക്കൽ സബ്ഡിവഷനു ഉണ്ട്. (ഇന്ത്യയിൽ ഏറ്റവും കൂടുതൽ മഴ ലഭിച്ചിരുന്ന ചിറാപ്പുഞ്ചി മേഘാലയിൽ ആണ്).

2016 ലെ തെക്ക് പടിഞ്ഞാറൻ കാലവർഷത്തിൽ മഴക്കുറവുണ്ടായ സ്ഥലങ്ങളുടെ പട്ടിക താഴെ.

ജൂണ്മാസത്തിൽ 3 ശതമാനത്തിന്റെ കുറവും ജൂലൈ മാസത്തിൽ 39 ശതമാനത്തിന്റെയും ഓഗസ്റ്റ് മാസത്തിൽ 45 ശതമാനത്തിന്റെയും

സെപറ്റംബറിൽ 66 ശതമാനത്തിന്റെയും മഴക്കുറവാണ് കേരളത്തിൽ ഉണ്ടായത്. സെപ്റ്റംബറിൽ രാജ്യത്താകമാനം 97% മഴ ലഭിച്ചപ്പോഴാണ് കേരളത്തിൽ ഈ കുറവ് ഉണ്ടായിരിക്കുന്നത്. (ജൂൺ ഒന്നിന് എത്തേണ്ട മഴ കേരളത്തിൽ 2016 ൽ എത്തിയത് 7 ദിവസം താമസിച്ച് 8 തീയതിയാണ് എത്തിയത്. 2015 ൽ മഴ എത്തിയത് അഞ്ച് ദിവസം താമസിച്ച് ജൂൺ 6 ആം തീയതിയും).

2015 ലും കാലവർഷത്തിൽ(ഇടവപ്പാതി) 26 ശതമാനത്തിന്റെ കുറവാണ് കേരളത്തിൽ ഉണ്ടായത്. 2015 ലെ ഇടവപ്പാതിയുടെ കണക്ക് ഇങ്ങനെ..
(മാസം ലഭിച്ചമഴ (ബ്രായ്ക്കറ്റിൽ പ്രതീക്ഷിച്ച മഴ) , കൂടുതൽ/കുറവ് ശതമാനക്കണക്ക്)
ജൂൺ                 563.6 (649.8) -13
ജൂലൈ              406.0 (726.1) -44
ഓഗസ്റ്റ്              252.2 (419.5) -40
സെപ്റ്റംബർ  292.9 (244.2)  20
കാലവർഷത്തിലാകെ 1514.7(2039.6) -26

{

മെട്രോളിജിക്കൽ  ഡിപ്പർട്ട്മെന്റിന്റെ ന്റെ കണക്ക് അനുസരിച്ച്(1951-2001) നമ്മുടേ കേരളത്തിലെ വാർഷിക(ജനുവരി-ഡിസംബർ) മഴയുടെ  ശരാശരി അളവ് (മി.മി) 2924.3 ആണ്. വാർഷിക ശരാശരി 3000മി.മീ കൂടുതൽ ഉള്ള രണ്ട് സംസ്ഥാനങ്ങളാണ് ഉള്ളത്. ഗോവയും മേഘാലയും. വാർഷിക ശരാശരി 2001-3000 ത്തിൽ പെടുന്നത് നമ്മുടെ കേരളത്തോടൊപ്പം വടക്ക് കിഴക്കൻ സംസ്ഥാനങ്ങളായ സിക്കിം (2971) , ആസ്സാം (2296) , അരുണാചൽ പ്രദേശ് (29933) , മണിപ്പൂർ(2039), ത്രിപുര(2475) , മിസോരാം(2626). കർണ്ണാടകയിലെ മഴയുടെ അളവ് 1147 ഉം തമിഴനാട്ടിലെ മഴയുടേ അളവ് 912 ഉം ആന്ധ്രയിലെ മഴയളവ് 912.9ഉം , തെലുങ്കാനയിൽ 942.6

}

കഴിഞ്ഞ അഞ്ചുവർഷങ്ങളിലെ (2012-2016) കേരളത്തിലെ മഴക്കണക്ക് താഴെ. (ഏറ്റവും കൂടുതൽ മഴ ലഭിക്കൂന്ന ജൂൺ-ഡിസംബർ മാസങളിലെ മഴയുടെ അളവാണ് പട്ടികയിൽ)

കേരളത്തിൽ ഏറ്റവും കൂടുതൽ മഴ ലഭിക്കുന്ന ജൂലൈ മാസത്തിൽ 2013 ൽ ഒഴിച്ച് ബാക്കി വർഷങ്ങളിൽ മഴക്കുറവായാണ് നമുക്ക് ലഭിച്ചത്.

(2016 ഡിസംബറിൽ ഇതുവരെ 27 ശതമാനത്തിന്റെ മഴക്കുറവ് ഉണ്ടായിട്ടുണ്ട്. ഡിസംബർ ഒന്നു മുതൽ ഏഴ് വരെയുള്ള ആഴ്ചയിൽ 12.9 മി.മീ മഴലഭിക്കേണ്ടിടത്ത് 9.4 മഴ ലഭിച്ചിട്ടുണ്ട്)

2016 ൽ മഴ നമ്മളോട് ചെയ്തത്!!!!

2016 ജനുവരി മുതൽ നവംബർ വരെയുള്ള കാലയളവിൽ കേരളത്തിൽ 36 ശതമാനത്തിന്റെ മഴക്കുറവാണ് രേഖപ്പെടൂത്തിയിരിക്കൂന്നത്. വേനൽമഴയിൽ 21 ശതമാനത്തിന്റെ കുറവുണ്ടായപ്പോൾ മാർച്ച്-മെയ് കാലയളവിലെ പ്രി-മൺസൂൺ സമയത്ത് 18 ശതമാനത്തിന്റെ മഴക്കുറവാണ് ഉണ്ടായത്. ഇടവപ്പാതിയിൽ 34 ശതമാനത്തിന്റെ കുറവുണ്ടായപ്പോൾ തുലാമഴയിൽ 63 ശതമാനത്തിന്റെ കുറവാണ് ഉണ്ടായത്.

2016 ലെ ഓരോ മാസത്തയും മഴയളവ് നോക്കുക (ഡിസംബർ ഒഴികെ)

(ഡിസംബറിൽ ഇതുവരെ 27 ശതമാനത്തിന്റെ മഴക്കുറവ് ഉണ്ടായിട്ടുണ്ട്. ഡിസംബർ ഒന്നു മുതൽ ഏഴ് വരെയുള്ള ആഴ്ചയിൽ 12.9 മി.മീ മഴലഭിക്കേണ്ടിടത്ത് 9.4 മഴ ലഭിച്ചിട്ടുണ്ട്)

2016 ൽ നമ്മുടെ ജില്ലകളിലെ മഴക്കാലയളവിലെ മഴയളവിന്റെ പട്ടിക താഴെ

ഏറ്റവും കൂടുതൽ മഴക്കൂറവ് ഉണ്ടായിരിക്കൂന്നത് വയനാട്ടിൽ ആണ്. 60 ശതമാനം മഴകൂറവാണ് വയനാട്ടിൽ ഉണ്ടായിരിക്കൂന്നത്. അതായത് പെയ്യേണ്ട മഴയിൽ 40 ശതമാനം മഴമാത്രമേ വയനാട്ടിൽ ലഭിച്ചുള്ളൂ. തൃശൂരിലും മലപ്പുറത്തും 54 ശതമാനം മഴയാണ് ലഭിച്ചത്. 

46 ശതമാനത്തിന്റെ  കുറവ്. ഏറ്റവും കുറവ് മഴക്കുറവ് ഉണ്ടായിരിക്കുന്നത് കൊല്ലത്താണ്. 22 ശതമാനം മഴ കുറവ്. ആലപ്പുഴയിൽ 37 ശതമാനം മഴക്കുറവുണ്ടായപ്പോൾ ഇടുക്കിയിൽ 36 ശതമാനം മഴക്കുറവാണ് രേഖപ്പെടുത്തിയത്.

ഡിസംബർ പാതിയാകുന്നതിനുമുമ്പേ വേനൽ എത്തിയിരിക്കുന്നു. മഴക്കുറവുകൊണ്ട് തന്നെ ജലാസ്രോതസുകൾ വറ്റിതുടങ്ങിയിരിക്കുന്നു. കൃഷിക്കും കുടിവെള്ളത്തിനും ഒക്കെ നമുക്ക് വെള്ളം തന്നെ വേണം. കേരളത്തെ സംബന്ധിച്ച് വൈദ്യുതിക്കായും ജലത്തെ തന്നെ ആശ്രയിക്കേണ്ടതുണ്ട്. അപ്പോൾ മഴക്കുറവ് നമ്മളെയെല്ലാം ഒരുതരത്തിൽ അല്ലങ്കിൽ മറ്റൊരുതരത്തിൽ ബാധിക്കുകതന്നെ ചെയ്യും. മഴവെള്ളത്തെ മണ്ണിലേക്ക് 'ഇറക്കി'വിടാൻ കഴിയുന്നില്ലങ്കിൽ വരും കാലയളവിൽ വരൾച അതീവരൂക്ഷമാവുക തന്നെ ചെയ്യും....

ചിറാപ്പുഞ്ചി നമുക്കൊരു പാഠമാണ്...

ലോകത്തിൽ തന്നെ ഏറ്റവും കൂടുതൽ മഴപെയ്യുന്ന സ്ഥലങ്ങളിലൊന്നാണ് മേഘാലയിലെ ചിറാപ്പുഞ്ചി. പക്ഷേ അവിടയും വേനൽക്കാലത്ത് ഇപ്പോൾ കുടിവെള്ളം ശേഖരിക്കാനായി ആളുകൾക്ക് സഞ്ചരിക്കേണ്ടി വരുന്നു. വനനശീകരണം കൊണ്ട് ഭൂമിയിലേക്ക് വെള്ളം ശേഖരിക്കപ്പെടാതെ പോകുന്നതാണ് കാരണം. ജലസ്രോതസുകളും ജലശേഖരങ്ങളും (വയൽ/തണ്ണീർത്തടങ്ങൾ/തടാകങ്ങൾ....)ഒക്കെ നശിപ്പിക്കൂന്ന കേരളവും ഈ പാതകത്തിന് വലിയ വില കൊടുക്കേണ്ടി വരും..... മഴ നമ്മളെ ചതിക്കുമ്പോൾ ജലസ്രോതസുകളെ നശിപ്പിച്ചും ഇല്ലാതാക്കിയും നമ്മളും പ്രകൃതിയെ ചതിക്കുന്നു...... വെള്ളം കിട്ടാക്കനിയാകുന്ന ഒരു കാലത്തിലേക്കാണോ നമ്മുടെ പ്രയാണം....... മഴ കനിഞ്ഞനുഗ്രഹിച്ചിരുന്ന കേരളം എന്ന 'ദൈവത്തിന്റെ സ്വന്തം നാട്ടിൽ'നിന്ന് മഴ ഓടിയൊളിക്കുമ്പോൾ നമ്മുടെ നാടും പതുക്കെ പതുക്കെ മരുഭൂമിയാവും.... (നമുക്കെപ്പോഴും 'ഗ്രീൻ പ്രോട്ടോക്കോൾ' എന്ന് പറയുന്നത് കെട്ടിടഭിത്തിയിൽ പച്ചപ്പെയിന്റ് അടിക്കുന്നതാണ്.)

മഴക്കുറവ് നമ്മളെ എങ്ങനെയൊക്കെ ബാധിക്കും എന്ന് അടൂത്ത പോസ്റ്റിൽ.....

:: അവലംബം ::
തിരുവനന്തപുരം METEOROLOGICAL CENTRE ന്റെ റിപ്പോർട്ടുകൾ
ഭാരത സർക്കാർ Hydromet Division ന്റെ Customized Rainfall Information System (CRIS)
India Meteorological Department ന്റെ 2016 Southwest Monsoon End of Season Report
India Meteorological Department ന്റെ Monsoon Report 2015 (India Meteorological Department Pune)

ചെരുപ്പു പോയി നോട്ട് കിട്ടി....

രാവിലെ ബാങ്കിലേക്ക്....

നോട്ട് മാറാനുള്ളവന്മാരെല്ലാം മാറിക്കോണ്ട് പോയിട്ടൂണ്ടാവും. ബാങ്കിലേക്ക് ചെല്ലുന്നു...ടോക്കൺ എടുക്കുന്നു. നോട്ട് മാറാൻ കൊടുക്കുന്നു. നൂറിന്റെയും അമ്പതിന്റെയും ഇരുപതിന്റെയും നോട്ടൂകൾ വാങ്ങുന്നു. തിരികെ പോരുന്നു. തിരക്കില്ലങ്കിൽ എറ്റിഎം കൗണ്ടറിൽ നിൽക്കൂന്നു. ഒരു രൻടായിരം എടുക്കുന്നു. എല്ലാത്തിനും കൂടെ ഒരു പതിനഞ്ച് മിനിട്ട്. ഇനി ചെല്ലുന്നുടനെ എറ്റിഎം  കൗണ്ടറിൽ ആളില്ലങ്കിൽ ആദ്യം പൈസ എടുക്കണം..

ബാങ്കിന്റെ വാതിക്കൽ എത്തുന്നു.... ബാങ്കിൽ കയറിയവരുടെ ചെരുപ്പുകൾ വാതിക്കൽ ഊരിയിട്ടിട്ടൂണ്ട്. ആ ചെരുപ്പ് നിര വാതിക്കൽ നിന്ന് റോഡ്സൈഡിലേക്കും നീണ്ടിട്ടുണ്ട് . ബാങ്കും ഇപ്പോൾ ചെരുപ്പിട്ട് കയറാനാവാത്ത വിശുദ്ധ സ്ഥലമായോ? ചിലപ്പോൾ ആയിക്കാണും. ചെരുപ്പിലെ പൊടിയും ചെളിയും ബാങ്കിൽ ചവിട്ടി കയറ്റി ആ വിശുദ്ധിക്ക് കളങ്കം വരുത്തിയാൽ കാശ് കിട്ടാതെ പോയാലോ? ആശ്വാസങ്ങളും വിശ്വാസങ്ങളും ആണല്ലോ കാലാന്തരത്തിൽ അന്ധവിശ്വാസങ്ങളാകുന്നത്. ആരാണങ്കിലും ഇപ്പോൾ ബാങ്കുകളെ ക്ഷേത്ര/പള്ളികളായി കണ്ടുപോകും. വായിലോട്ട് എന്തെങ്കിലും ചെല്ലണമെങ്കിൽ ബാങ്ക് തന്നെ കനിയണം. എന്തിനാ വെറുതെ ചിന്തിച്ച് കൂട്ടൂന്നത് . ചെരുപ്പ് ഊരിയിടൂക , അകത്ത് കയറുക.

ചെരുപ്പ് ഊരിയിട്ടു. ബാങ്കിന്റെ വാതിക്കൽ ഒന്ന് തൊട്ട് നമസ്ക്കരിക്കണമെന്നുകൂടീ ഉണ്ടായിരുന്നു. ഒന്നു കുനിയാനുള്ള സ്ഥലം ബാക്കി  ഇല്ലായിരുന്നതുകൊണ്ട് കുനിഞ്ഞില്ല. ടോക്കൺ എടൂത്തു. നമ്പർ 121. കൗണ്ടറിലെ നമ്പർ നോക്കി- 32. ഇനിയും പത്തെൺപത് പേരുണ്ട് മുമ്പിൽ. ഇനിയും എറ്റിഎം കൗണ്ടറിൽ പോയി നോക്കാം. ഒരൊറ്റ മനുഷ്യനും എറ്റിഎം കൗണ്ടറിൽ ഇല്ല. അഞ്ചാറു കാർഡുമായി കമ്യൂണീസ്റ്റുകാർ എല്ലാ എടിഎമ്മും കാലിയാക്കുവാണന്ന് സോമൻജി എന്ന സാമ്പത്തിക വിദഗ്ദ്ധനെ ഉദ്ധരിച്ച് അന്താരാഷ്ട്ര പത്രമായ കിഴക്കൻതീരം റിപ്പോർട്ട് ചെയ്തത് ശരിയാണന്ന് തോന്നുന്നു. എന്നും മൂന്നാലുകിലോ 'സ്ലിപ്പുകൾ' തറയിൽ കിടക്കുന്ന എടിഎമ്മിനകത്ത് ഒരൊറ്റ സ്ലിപ്പും കിടപ്പില്ല. ഈ കമ്യൂണിസ്റ്റുകാർ എറ്റിഎം  കാലിയാക്കിതിനോടൊപ്പം സ്ലിപ്പുകളും കാലിയാക്കിയോ? 

ഇനി ബിരിയാണി കൊടുക്കുന്നുൻടങ്കിലോ? കാർഡിട്ടു. നീ എവിടുന്ന് വരുന്നടാ എന്ന ഭാവത്തിൽ എറ്റിഎം  കാർഡ് റീഡ് ചെയ്തു. പേരുവന്നു, പിൻ അടിച്ചു. കാശ് കൊടൂത്തു..... എന്റെയുള്ളിൽ പ്രിന്റ് ചെയ്ത് തരാൻ സ്ലിപ്പൊന്നും വെച്ചിട്ടല്ലന്ന് മെഷ്യൻ പറഞ്ഞു. സ്ലിപ്പ് വേണ്ട. ക്യാഷ് മാത്രം മതിയെന്ന് പറഞ്ഞു.

കിർ..കിർ..കിർ...കിർ....... 

ഹൊ!!! എന്റെ നിൽപ്പും  ഭാവവും കണ്ടിട്ട് എറ്റിഎം  മെഷ്യൻ നോട്ട് അടിച്ച് തരുകയാണന്ന് തോന്നുന്നു..... കിർ..കിർ..കിർ.. നിർത്തി അവസാനം എറ്റിഎം  മെഷ്യൻ തോൽവി സമ്മതിച്ചിട്ട് പറഞ്ഞു....

മോനേ എന്റെ കൈയ്യ്യിൽ നയാ പൈസാ ഇല്ല. നീ വേണമെങ്കിൽ അടൂത്തുള്ള ഏതെങ്കിലും എടിഎമ്മിൽ പോയി എടൂത്തോ....

നിഷ്കളങ്കനായ, സത്യം മാത്രം പറയുന്ന ആ എടിഎം മെഷ്യനെ തെറി വിളിച്ചിട്ട് കാര്യമൊന്നും ഇല്ലല്ലോ? എടിഎം കൗണ്ടറിന്റെ മുന്നിൽ നിന്ന് മനസിലൊരു പാട്ടു പാടി മനസിനെ തണുപ്പിച്ചൂ.. സന്യാസിനീ നിന്‍ പുണ്യാശ്രമത്തില്‍ എന്ന ട്യൂണീൽ തന്നെ മനസിൽ പാടി തീർത്തു.

എടിഎമ്മേ... ഓ ഓ ഓ

എടിഎമ്മേ നിന്‍ കൗണ്ടറിൽ ഞാന്‍

എടിഎം കാർഡുമായി വന്നു...

ആർക്കും തുറക്കാത്ത കാഷ് വിൻഡോയ്ക്കു മുമ്പിൽ

അന്യനെ പോലെ ഞാന്‍ നിന്നു..

എടിഎമ്മേ നിന്‍ കൗണ്ടറിൽ ഞാന്‍

എടിഎം കാർഡുമായി വന്നു......

നിന്റെ ദു:ഖാര്‍ദ്രമാം നോട്ടെണ്ണൽ ശബ്ദ്ദത്തിൽ

എന്റെ സ്വപ്നങ്ങളലിഞ്ഞു സഗദ്ഗദം

എന്റെ മോഹങ്ങള്‍ മരിച്ചു...

നിന്റെ ദു:ഖാര്‍ദ്രമാം നോട്ടെണ്ണൽ ശബ്ദ്ദത്തിൽ

എന്റെ സ്വപ്നങ്ങളലിഞ്ഞു സഗദ്ഗദം

എന്റെ മോഹങ്ങള്‍ മരിച്ചു...

നിന്റെ ശരീരത്തിലെ കാർഡ് റീഡറിൽ

ഒരച്ച്  എന്റെ കാർഡ് തേഞ്ഞു...

ആയിരം.. അഞ്ഞൂറിനോടെന്ന പോലെ

യാത്ര ചോദിപ്പൂ ഞാന്‍ ...

എടിഎമ്മേ നിന്‍ കൗണ്ടറിൽ ഞാന്‍

എടിഎം കാർഡുമായി വന്നു......

നിന്റെ ഏകാന്തമാം ക്യാമറ മെമ്മറിയിൽ

എന്നെ എന്നെങ്കിലും കാണും

ഒരിക്കല്‍ നീ എന്റെ കാർഡ് ഹിസ്റ്ററി കാണും...

നിന്റെ ഏകാന്തമാം ക്യാമറ മെമ്മറിയിൽ

എന്നെ എന്നെങ്കിലും കാണും

ഒരിക്കല്‍ നീ എന്റെ കാർഡ് ഹിസ്റ്ററി കാണും....

അന്നുമെന്‍ കാർഡ് നിന്നോട്‌ മന്ത്രിക്കും

നിന്നെ ഞാന്‍ സ്നേഹിച്ചിരുന്നു

ആയിരം.. അഞ്ഞൂറിനോടെന്ന പോലെ

യാത്ര ചോദിപ്പൂ ഞാന്‍ ...

എടിഎമ്മേ നിന്‍ കൗണ്ടറിൽ ഞാന്‍

എടിഎം കാർഡുമായി വന്നു...

ആർക്കും തുറക്കാത്ത കാഷ് വിൻഡോയ്ക്കു മുമ്പിൽ

അന്യനെ പോലെ ഞാന്‍ നിന്നു..

എടിഎമ്മേ നിന്‍ കൗണ്ടറിൽ ഞാന്‍

എടിഎം കാർഡുമായി വന്നു...

എടിഎമ്മേ... ഓ ഓ ഓ

ഇനി ബാങ്കിൽ പോയി നോക്കാം. നോക്കി . നമ്പർ 40 ആയിട്ടുണ്ട്. ഇനി സമയം ഉണ്ട്. ഒന്നു ചായ കുടിച്ചിട്ട് വരാം. ചായക്കടയിൽ ചെന്നപ്പോഴേ കണ്ടു , ദയവായി ചില്ലറ തരിക. പോക്കറ്റിൽ ചില്ലറ തപ്പി നോക്കി. സഹകരണബാങ്കിലെ അക്കൗണ്ടിൽ മൂവായിരം രൂപ നിക്ഷേപമുള്ള കള്ളപ്പണക്കാരന്റെ കീശയിൽ എവിടെ നിന്ന് ചില്ലറ വരാനാ.? 

തപ്പലോട് തപ്പൽ. വീണ്ടും തപ്പൽ. ബൈക്കിലെ സഞ്ചിയും തപ്പി

അവസാനം ഒരു ചായക്കുള്ള കാശ് കിട്ടി.

അതുകൊടൂത്ത് ചായ വാങ്ങിക്കുടിക്കൂമ്പോൾ അടുത്തിരിക്കുന്നവനെ നോക്കി.

അവൻ പഴ്സിൽ നിന്ന് കുറേ എറ്റിഎം കാർഡുകൾ എടുത്ത് എണ്ണുന്നു...

കമ്യൂണീസ്റ്റ് തന്നെ.. ഉറപ്പ്... രാജ്യസ്നേഹം ഇല്ലാത്ത രാജ്യദ്രോഹി....

കണ്ടില്ലേ എറ്റിഎം കാർഡിരുന്ന് എണ്ണുന്നത്....

കള്ളപ്പണക്കാരൻ തന്നെ... അല്ലാതെ ഇവനൊക്കെ ഇത്രയും അക്കൗണ്ടിൽ ഇടാൻ കാശ് എവിടെ നിന്ന്? കാർഡൊക്കെ വെച്ച് തല ഉയർത്തിയപ്പോൾ ആളെ മനസിലായി..... കേന്ദ്രസർക്കാർ പാർട്ടിക്കാരൻ.... പരിചയക്കാരൻ.

നിങ്ങളു കമ്യൂണീസ്റ്റായോ? ചോദിച്ചു.

ഇല്ല... എന്താ ചോദിച്ചത്? മറു ചോദ്യം.

അല്ല ഇത്രയും എറ്റിഎം കാർഡൊക്കെ കൊണ്ട് എറ്റിഎം കാലിയാക്കാൻ ഇറങ്ങിയതുകൊണ്ട് ചോദിച്ചതാ...

ശവത്തിൽ കുത്താതെ പിള്ളേച്ചാ എന്ന് പറയാതെ പറഞ്ഞ് ഇഷ്ടൻ എഴുന്നേറ്റു.....

വീണ്ടും ബാങ്കിലേക്ക് . മുൻ പതിവുപോലെ ചെരുപ്പ് ഊരിയിട്ട് നഗ്നപാദനായി ഭക്തീ ആദരവുകളോടെ ബാങ്കിനകത്ത് കയറി. നമ്മുടേ നമ്പർ വരാൻ കാത്തിരുന്നു. അവസാനം നമ്പർ വന്നു. സ്ലിപ്പ് കൊടുത്തു. രണ്ടായിരത്തിന്റെ ഗുണീതങ്ങളായേ കാശ് തരാൻ കഴിയുള്ളൂന്ന്. കൗണ്ടറിൽ 2000 ത്തിന്റെ നോട്ട് മാത്രം. രണ്ടായിരത്തഞ്ഞൂറ് വെട്ടി രൻടായിരം എഴുതി കൊടുത്തപ്പോൾ തിളങ്ങുന്ന രൻടായിരം നോട്ട് തന്നു. ഇരു കൈയ്യും നീട്ടി നോട്ട് വാങ്ങി. ഇനി ചില്ലറയാക്കണമെങ്കിൽ വേറെ വഴി നോക്കണം. രണ്ടായിരമെങ്കിൽ രൻടായിരം... കിട്ടീയതാട്ട്. നോട്ട് മടക്കാതെ പാസ് ബുക്കിൽ തന്നെ വെച്ചു. പാസ്ബുക്കിനകത്ത് ഇരിക്കാനുള്ള വലിപ്പമേ നോട്ടിനുള്ളൂ.

തിരികെ പോരാനായി ബാങ്കിന്റെ വാതിൽ തുറന്നു ചെരുപ്പ് എടുക്കാനായി നോക്കുമ്പോൾ ആ സത്യം ഞാൻ അറിഞ്ഞു. ആരോ ചെരുപ്പ് അടിച്ചുമാറ്റിക്കൊണ്ട് പോയിരിക്കൂന്നു. ചെരുപ്പുകൾക്കിടയിൽ മുങ്ങിത്തപ്പിയെങ്കിലും ചെരുപ്പ് കൻടെത്താൻ കഴിഞ്ഞില്ല. അതേപോലെത്തെ ഒരൊറ്റ ചെരുപ്പും അവിടെയില്ല. ഇനി വേറെ ഏതെങ്കിലും ഒരു ചെരിപ്പ് ഇട്ടോട്ട് പോയി പിടിവീണാൽ ഇതുവരെ ആ പ്ഞ്ചായത്തീന്ന് പോയിട്ടൂള്ള എല്ലാ ചെരുപ്പുകളുടെയും ഉത്തരവാദിത്തം ഏറ്റെടുക്കേണ്ടീ വരും എന്നുള്ളതുകൊണ്ട് ആ മാർഗ്ഗം ഉപേക്ഷിച്ചു . ..........

ദേ നിങ്ങളോരു പാട്ടു കേൾക്കുന്നില്ലേ... ഇല്ലേ.. പക്ഷേ ഞാൻ കേൾക്കുന്നു.... ബാങ്കിന്റെ വാതിൽ തുറന്നപ്പോൾ കേട്ട അതേ പാട്ട്....

ഇടപാടുകാരാ നിനക്കു ഞാനെന്റെ

നോട്ടറകൾ തുറന്നൂ

പുഷ്പപാദുകം പുറത്തുവയ്ക്കു നീ

നഗ്നപാദനായ് അകത്തുവരൂ

ഇടപാടുകാരാ......

വിഡ്രോസ്ലിപ്പെഴുതിയ കൈകളില്‍

ചില്ലറ നോട്ടു നൽകി വരവേല്‍ക്കും

നിങ്ങളുടെവീടുകളില്‍...

ചില്ലറ പൈസകൾ കിലുങ്ങും..

വീട്ടൂകാരികള്‍ കണ്‍കളില്‍

കോപദേഷ്യമോടെ നടമാടും...

നിങ്ങളുടെ ഹൃദയ മണ്ഡപങ്ങളില്‍

രുദ്രവീണകള്‍ പാടും... താനേ പാടും...

ഇടപാടുകാരാ നിനക്കു ഞാനെന്റെ

നോട്ടറകൾ തുറന്നൂ

പുഷ്പപാദുകം പുറത്തുവയ്ക്കു നീ

നഗ്നപാദനായ് അകത്തുവരൂ

ഇടപാടുകാരാ......

എന്തെല്ലാം സ്വപ്നങ്ങളോടെ കയറിയതാ അകത്ത്. ദാ ഇപ്പം ഇഞ്ചി കടിച്ച കുരങ്ങനെപ്പോലെ ചെരുപ്പും പൊയി രണ്ടായിരത്തിന്റെ ഒറ്റ നോട്ടുമായി നിൽക്കൂന്നു.... 

ചെരുപ്പു പോയി നോട്ട് കിട്ടീ ഡും ഡും ഡും...

അല്ലങ്കിൽ തന്നെ എന്തെങ്കിലും ഒക്കെ നഷ്ടപ്പെടൂത്താതെ എന്തെങ്കിലും നേടാൻ കഴിയില്ലന്ന് എല്ലാവരും പറയുമ്പോൾ , ഒരു ചെരുപ്പ് നഷ്ടപ്പെടുത്തിയിട്ടാണങ്കിലും 2000 രൂപ കിട്ടിയല്ലോ എന്ന് ആശ്വസിക്കാം. ഏതായാലും ചെരുപ്പ് വാങ്ങി രണ്ടായിരത്തെ ചില്ലറയാക്കാൻ ഒന്നുരൻട് മാസത്തേക്ക് പറ്റുമെന്ന് തോന്നുന്നില്ല... എങ്ങനെയെങ്കിലും രണ്ടായരത്തിന്റെ ചില്ലറമാറിയിട്ട് പുതിയ ചെരുപ്പ് വാങ്ങാം....  

അപ്പോ ഇനി ചെരുപ്പുവാങ്ങാൻ ഇറങ്ങുക തന്നെ..... 

പുതുവർഷ തീരുമാനങ്ങൾ

പുതുവർഷം വരുമ്പോൾ ചില ജീവിത മാറ്റങ്ങൾക്ക് നമ്മൾ ശ്രമിക്കാറുണ്ട്. ചിലർ തങ്ങളുടെ ദുശീലങ്ങൾ ഉപേക്ഷിക്കുമെന്ന് തീരുമാനം എടുക്കുമ്പോൾ ചിലർ തങ്ങളുടെ ജീവിത ശൈലികളിലെ മാറ്റങ്ങൾക്ക് ശ്രമിക്കും...... ചില മാറ്റങൾ നമ്മുടെ ജീവിതത്തെ തന്നെ മാറ്റി മറിക്കും.... നമ്മുടെ ചില മനോഭാവങ്ങളിൽ മാറ്റം വരുത്തിയാൽ/പുതിയ ചില തീരുമാനങ്ങൾ എടുത്താൽ ജീവിതം മനോഹരമാക്കാം... ഇതാ ചില തീരുമാനങ്ങൾ .....

1. മനസുകളിലെ മാലിന്യം മാറ്റുക.

വേനൽക്കാലം. നഗരത്തിൽ പൊടിയുടെ ശല്യം ഭയങ്കരമായിരിക്കുന്നു. വാഹങ്ങൾ പോകുമ്പോഴും ചൂട് കാറ്റ് അടിക്കുമ്പോഴും പൊടി പറന്ന് കാഴ്ചകളെ മറയ്ക്കുന്നു. വലിയ പാർപ്പിട സമുച്ചയത്തിലേക്ക് താമസിത്തിനായി ഭാര്യയും ഭർത്താവും എത്തി. തങ്ങളുടെ ഫ്ലാറ്റിലെ കണ്ണാടി ജനാലയിലൂടെ അവർ പുറം കാഴ്ചകൾ നോക്കി നിൽക്കും. ജനൽ പാളികൾ തുറന്നിട്ടാൽ പുറത്തെ പൊടി അകത്തേക്ക് കയറും എന്നതിനാൽ അവർ ജനാലകൾ തുറക്കാറില്ല. പുതിയ താമസക്കാർ ആയതുകൊണ്ട് മറ്റുള്ളവരുമായി അധികം സംസാരവും ഇല്ല. പുറം ലോകത്തെ കാഴചകൾ എന്ന് പറയുന്നത് അവർക്കെപ്പോഴും ജനാലയിലെ കണ്ണാടിയിലൂടെയുള്ള കാഴ്ചകൾ ആണ്. അവർ വന്ന ദിവസം മുതൽ എതിർ വശത്തുള്ള ഫ്ലാറ്റിലെ വൃദ്ധയായ സ്ത്രിയെ കാണാറുണ്ട്. വൃദ്ധയായ സ്ത്രി എന്നും വസ്ത്രങ്ങൾ വൃദ്ധയുടെ ഫ്ലാറ്റിലെ ബാൽക്കെണിയിൽ വിരിക്കുന്നത് അവർക്ക് കാണാം. ആ കാഴ്ച കാണുമ്പോൾ ഭാര്യ ഭർത്താവിനോട് എപ്പോഴും പറയും , "നോക്കൂ, ആ സ്ത്രി അവരുടെ വസ്ത്രങ്ങൾ കഴുകി ഇടുന്നത് കണ്ടോ, ഒരു വൃത്തിയും അതിനില്ല.. നിറങ്ങൾ ഒക്കെ മങ്ങി വൃത്തികേടായ വസ്ത്രങ്ങളാണ് അവരെന്നും ഉപയോഗിക്കുന്നത്". അവളോടൊപ്പം അയാളും ജനാലക്കലേക്ക് വന്ന് ആ കാഴ്ചകൾ കാണും. ഭാര്യ പറഞ്ഞത് ഭർത്താവ് സമ്മതിക്കും. ഒരു ദിവസം അവർ വൃദ്ധയുടെ വസ്ത്രങ്ങളെക്കുറിച്ച് കുറ്റം പറഞ്ഞ് നിൽക്കുമ്പോഴാണ് വേനൽ മഴ പെയ്തത്. വലിയ കാറ്റും മഴയും. മഴത്തുള്ളികൾ ശക്തിയായി അവർ നിന്ന ജനാലയിൽ പതിച്ചു. അവർ നോക്കി നിൽക്കെ വൃദ്ധ വിരിച്ചിട്ട വസ്ത്രങ്ങൾക്ക് നിറം കൂടി കൂടി വന്നു. മഞ്ഞ കളർ പിടിച്ച് വൃത്തികേടായ വസ്ത്രങ്ങൾ എന്ന് അവർ കുറ്റപ്പെടുത്തിയിരുന്ന വൃദ്ധയുടെ വസ്ത്രങ്ങൾ തൂവെള്ള നിറമായിരിക്കുന്നു. അവർ പരസ്പരം നോക്കി. അവരുടെ ഫ്ലാറ്റിന്റെ ജനാലകളിൽ പിടിച്ചിരുന്ന പൊടി മഴവെള്ളത്തിൽ ഒഴുകിപ്പോയപ്പോൾ അവരുടെ കാഴ്ചകൾക്ക് നിറം വന്നു. നമ്മുടെ മനസുകളിലെ മാലിന്യം നീക്കിയതിനു ശേഷം മറ്റുള്ളവരുടെ പ്രവൃത്തികളെ കാണാൻ ശ്രമിക്കൂ, നമുക്ക് അവരുടെ നന്മകളെ വേഗത്തിൽ മനസിലാക്കാൻ കഴിയും.

2. മറ്റുള്ളവരുടെ സന്തോഷത്തിൽ അസഹിഷ്ണത പ്രകടിപ്പാതെ പങ്കുചേരുക.

അയാൾ പതിവുപോലെ ട്രയിൻ യാത്രയിലാണ്. സൈഡിലാണ് അയാളുടെ സീറ്റ്, അതൊരു എമർജൻസി വിൻഡോയായിരുന്നു അടൂത്ത സ്റ്റേഷനിൽ നിന്ന് പത്തിരുപത് വയസുള്ള ചെറുപ്പക്കാരനും മൂന്നാലുപേരും കയറി. അവർ അയാൾ ഇരുന്നിരുന്ന സീറ്റിലും എതിർവശത്തുമായി ഇരുന്നു. ആ ചെറുപ്പക്കാരനോടൊപ്പം അമ്മയാണന്ന് തോന്നുന്ന സ്ത്രിയും ഇരുന്നു. ട്രയിൻ സ്റ്റേഷനിൽ നിന്ന് വിട്ടു തുടങ്ങിയപ്പോൾ ആ ചെറുപ്പക്കാരൻ അയാളോട് സൈഡ് സീറ്റിൽ ഇരുത്താമോന്ന് ചോദിച്ചു. അയാൾ ചെറുപ്പക്കാരനായി സീറ്റ് മാറിയിരുന്നു. അനുനിമിഷം ആ ചെറുപ്പക്കാരന്റെ മുഖത്തെ സന്തോഷം അയാൾ ശ്രദ്ധിച്ചു. ആദ്യമായിട്ടായിരിക്കും ആ ചെറുപ്പക്കാരൻ ട്രയിനിൽ യാത്ര ചെയ്യുന്നത്. ആ ചെറുപ്പക്കാരൻ ഓരോ നിമിഷവും സംശയങ്ങളും ചോദ്യങ്ങളുമായി അമ്മയെ ശല്യപ്പെടുത്തുന്നു. അയാൾക്കത് അരോചകമായി തോന്നി. അയാളുടെ ചില ചോദ്യങ്ങൾ കേട്ട് അയാൾക്ക് തമാശ തോന്നി. ഇതാണോ ആകാശം? ഇതാണോ മരങ്ങൾ? ഈ മരങ്ങൾ എന്താ ചെറുതായേ? ഇതാണോ പച്ച നിറം? ഇതാണോ തോട്? വെള്ളത്തിന്റെ നിറമെന്താണ്? അനേകായിരം ചോദ്യങ്ങൾ.... ആ ചെറുപ്പക്കാരൻ ചോദിക്കുന്നതിനെല്ലാം ആ അമ്മ ഉത്തരം പറയുന്നു. തന്റെ മക്കൾ യാത്രകളിൽ എന്തെങ്കിലും ഒക്കെ ചോദിച്ചാൽ താൻ അവരോട് പലപ്പോഴും ദേഷ്യപ്പെടുന്നത് അയാൾ ഓർത്തു. പക്ഷേ ഈ അമ്മ എല്ലാത്തിനും ഉത്തരം പറയുന്നു. നിസാരമായ കാര്യങ്ങൾ ആണ് ആ ചെറുപ്പക്കാരൻ ചോദിക്കുന്നത്... ആകാശത്ത് മഴക്കോൾ നിറഞ്ഞു. മഴച്ചാറി തുടങ്ങിയപ്പോൾ എല്ലാവരും ഷട്ടറിട്ട് ജനൽ ചില്ലുകൾ താഴ്ത്തി. പക്ഷേ ആ ചെറുപ്പക്കാരൻ ജനൽ താഴ്ത്തിയില്ല. ആകാശത്തെ മിന്നലുകൾ ആ ചെറുപ്പക്കാരൻ വിസ്മയത്തോടെ നോക്കുന്നു. ജനാലയിലൂടെ മഴവെള്ളം ദേഹത്ത് വീണപ്പോൾ അയാൾ ജനൽ താഴ്ത്താൻ ആവശ്യപ്പെട്ടു. ആ ചെറുപ്പക്കാരൻ അത് കേൾക്കാതെ ജനാലയിലൂടെ കൈകൾ മഴയത്തേക്ക് നീട്ടിപ്പിടിച്ചു. കൈക്കുള്ളിലെക്ക് വീഴുന്ന ജലത്തുള്ളികൾ ആ ചെറുപ്പക്കാരൻ മുഖത്തേക്ക് തെറുപ്പിച്ചു കൊണ്ടിരുന്നു.

"നിങ്ങടെ മകൻ ആദ്യമായിട്ടാണോ മഴ കാണുന്നത്?" അയാൾ ആ ചെറുപ്പ്ക്കാരന്റെ അമ്മയോട് ചോദിച്ചു.

"അതെ... അവൻ ഇന്നാദ്യമായിട്ടാണ് മഴ കാണുന്നത്." അമ്മ മറുപിടി പറഞ്ഞു.

"നിങ്ങളെന്താ മനുഷ്യനെ കളിയാക്കുകയാണോ?" അയാൾ വീണ്ടും ദേഷ്യത്തോടെ ആ അമ്മയോട് ചോദിച്ചു.

"അല്ല, ഞാൻ നിങ്ങളെ കളിയാക്കിയതല്ല. അവൻ മഴമാത്രമല്ല ഈ ലോകം തന്നെ ആദ്യമായിട്ടാണ് വ്യക്തമായി കാണൂന്നത്. " അമ്മ പറഞ്ഞു. മകന്റെ എതിർപ്പ് അവഗണിച്ചു കൊണ്ട് ആ അമ്മ ജനൽ കണ്ണാടി താഴ്ത്തി.

"എനിക്ക് മനസിലായില്ല" അയാൾ പറഞ്ഞു.

"മോന് ജനിച്ചപ്പോൾ മുതലേ കാഴ്ച ശക്തി കുറവായിരുന്നു. രണ്ട് വയസായപ്പോഴേക്കും കാഴ്ച പൂർണ്ണമായി നഷ്ടപ്പെട്ടു. പിന്നീടവന് എല്ലാം അന്ധകാരമായിരുന്നു. കഴിഞ്ഞ ആഴ്ചത്തെ ഓപ്പറേഷനോടെ അവന് കാഴ്ച തിരികെ കിട്ടി. ഞങ്ങൾ ഇപ്പോൾ ആശുപത്രിയിൽ നിന്ന് വീട്ടിലേക്ക് പോവുകയാണ്. നിങ്ങളുടെ ദേഹത്ത് വെള്ളം വീണതിന് ഞാൻ ക്ഷമ ചോദിക്കുന്നു." ആ അമ്മ യാളോട് പറഞ്ഞു.

അയാൾക്ക് എന്തെങ്കിലും പറയാനുള്ള വാക്കുകൾ തൊണ്ടയിൽ തടഞ്ഞു നിന്നു. അയാൾ സീറ്റിൽ നിന്ന് പതിയെ എഴുന്നേറ്റ് ആ ജനൽ ചില്ല് പൊക്കി വെച്ചു. മഴത്തുള്ളികളിലേക്ക് ആ ചെറുപ്പക്കാരൻ വീണ്ടൂം കൈകൾ നീട്ടി. തന്റെ ദേഹത്തേക്ക് വീഴുന്ന മഴത്തുള്ളികളിൽ അയാളുടെ മനസും നനഞ്ഞു.

3. ആരയും സമൂഹമധ്യത്തിൽ കൂട്ടുചേർന്ന് കുറ്റപ്പെടുത്താതിരിക്കുക

വണ്ടി വിടുമ്പോള്‍ വലിയ തിരക്കില്ലായിരുന്നു.അയാള്‍ക്കും അവള്‍ക്കുംഒരേ സീറ്റില്‍ തന്നെ സ്ഥലം കിട്ടി.അയാളുടെ കയ്യില്‍ ഒരു കൈക്കുഞ്ഞും ഉണ്ടായിരുന്നു.കളിപ്പാട്ടങ്ങള്‍ നിറച്ച ബിഗ്‌ഷോപ്പര്‍ അവളുടെ കൈയ്യിലായിരുന്നു.ഒരോ സ്‌റ്റോപ്പ്കഴിയുമ്പോഴും തിരക്ക് ഏറി വന്നു. അയാളുടെ കൈയ്യിലിരുന്ന് കുഞ്ഞ് കരയാന്‍തുടങ്ങി.കുഞ്ഞ് കരച്ചില്‍ നിര്‍ത്തുന്ന മട്ടില്ല.അവന്റെ കരച്ചിലിന് ശക്തി ഏറിവന്നു.അവള്‍ കുഞ്ഞിനെ വിളിക്കാ‍ന്‍ ശ്രമിക്കുമ്പോഴെല്ലാം അവനത് കണ്ടില്ലന്ന് നടിച്ചു.അയാളുടെകൈയ്യില്‍ നിന്ന് മാറാന്‍ അവന്‍ സമ്മതിച്ചില്ല.

അവള്‍ ബാഗില്‍ നിന്ന് കുപ്പിപ്പാല്‍ എടുത്ത് അവന്റെ ചുണ്ടോട് അടിപ്പിച്ചു.അവനത് വായില്‍വെക്കാന്‍ സമ്മതിച്ചില്ല.ബസിന് വെളിയിലേക്ക് കൈചൂണ്ടി ഉച്ചത്തില്‍ കരഞ്ഞു.അവളുടെ മുഖം വിവര്‍‌ണ്ണമായി തുടങ്ങിയിരുന്നു.”കുഞ്ഞിന് വിശക്കുന്നുണ്ടാവും..അവന്മുലപ്പാല്‍ കൊടുക്ക് കൊച്ചേ ?” അവരുടെ സീറ്റിനു പുറകിലിരുന്ന അമ്മച്ചി പറഞ്ഞു.അവളത് കേട്ടതായി നടിച്ചില്ല.

വണ്ടി ചങ്ങനാശേരി വിട്ടു.കുഞ്ഞ് അപ്പോഴും അയാളുടെ കൈയ്യിലിരുന്ന് കരയുകയാണ്.അവളുടെ കൈയ്യിലേക്ക് പോകാന്‍ കുഞ്ഞ് കൂട്ടാക്കിയില്ല.”എടീ കൊച്ചേ കുഞ്ഞിനെയെടുത്ത് പാലുകൊടുക്ക്... നാണക്കേടൊന്നും വിചാരിക്കേണ്ട”അമ്മച്ചി അവളെവിടുന്ന മട്ടില്ല.എന്നിട്ടും അവള്‍ അതിന് തുനിയാതിരുന്നത് ആളുകളെ പലവഴിക്ക്ചിന്തിപ്പിച്ചു.

“ഇവരാ കുഞ്ഞിനെ തട്ടിക്കൊണ്ട് പോവാണന്നാ തോന്നുന്നത്..കുഞ്ഞ് അവളുടെഅടുത്തേക്ക് ചെല്ലുന്നുപോലുമില്ല...”ആരോ അഭിപ്രായപ്പെട്ടു.

“ബസ് നേരേ പോലീസ് സ്‌റ്റേഷനിലോട്ട് വിട്...”അടുത്ത ആള്‍ .

ആളുകള്‍ അവളോടും അയാളോടും ഒരോന്നോരോന്ന് ചോദിക്കാന്‍ തുടങ്ങി.അവളുടെകണ്ണില്‍ നിന്ന് കണ്ണീര്‍ ഒഴുകി.ബസ് പോലീസ് സ്‌റ്റേഷനിലേക്ക് തിരിഞ്ഞു.അയാളുടെമൊബൈല്‍ ബെല്ലടിച്ചു.അവള്‍ കുഞ്ഞിനെ ബലമായി കൈയ്യിലേക്ക് വാങ്ങി.അയാള്‍ റിസീവര്‍ ചെവിയോട് അടുപ്പിച്ചു. “സര്‍ ,ഓര്‍ഫനേജില്‍ നിന്നാണ്. ദത്തെടുക്കല്‍ രേഖകളില്‍ മാഡം ഇടതുതള്ളവിരലിന്റെ തമ്പ്‌ ഇപ്രക്ഷനാണ് പതിപ്പിച്ചിരിക്കുന്നത്.വലതു തള്ളവിരലിന്റെ തമ്പ്ഇം‌പ്രക്ഷനായിരുന്നു വേണ്ടിയിരുന്നത്....”

അവളുടെ ഇടതു തള്ളവിരലിലെ മഷിശരിക്ക് ഉണങ്ങിയിരുന്നില്ല.ബസ് പോലീസ്സ്‌റ്റേഷന്റെ മുന്നില്‍ എത്തിയിരുന്നു.കുഞ്ഞ് കരച്ചില്‍ നിര്‍ത്തി അവളുടെ മാറിന്റെചൂടേറ്റ് ഉറങ്ങി തുടങ്ങിയിരുന്നു. 

4. നമുക്കും നന്മകൾ വറ്റാത്ത ന്യായധിപന്മാർ ആകാം.

കഴിഞ്ഞ ഡിസംബർ 13 ആം തീയതി ദേശാഭിമാനി പത്രത്തിന്റെ ഓൺലൈൻ എഡീഷനിൽ വയിച്ച ഒരു വാർത്ത. പഞ്ചാബ് നാഷ്ണൽ ബാങ്കിൽ നിന്ന് സുകുമാരൻ എന്ന ആൾ ഒരു ലക്ഷം രൂപ വായ്പ എടുത്തു. വായ്പ അടയ്ക്കുന്നതിനു മുമ്പ് അയാൾ മരിച്ചു. ആ വായ്പയുടെ ബാധ്യത സുകുമാരന്റെ ഭാര്യയായ ഗിരിജയ്ക്കായി. ഹൃദ്രോഗിയായ മകനും അർബുദ രോഗിയായ ഗിരിജയ്ക്കും വായ്പ തിരിച്ചടയ്ക്കാൻ കഴിയാതെ വന്നു. ബാങ്ക് അവരുടെ അവരുടെ ഭൂമി ജപ്തി ചെയ്തു. ഗിരിജ ലീഗല്‍ സര്‍വീസ് അതോറിറ്റിയില്‍ പരാതിയുമായി എത്തി. ലോക് അദാലത്തില്‍  കുടിശിഖ മുപ്പതിനായിരമായി ബാങ്ക് കുറച്ചെങ്കിലും ആ സ്ത്രിക്ക് അത് അടയ്ക്കാൻ കഴിയാതെ വന്നു. കേസിൽ വിധിപുറപ്പെടുവിച്ച ജഡ്ജി തന്നെ ആ സ്ത്രിയെ സഹായിക്കാൻ മുന്നിട്ടിറങ്ങി. ജഡ്ജി തന്റെ സഹപ്രവർത്തകരുടെ സഹായം തേടി. എല്ലാവരും കൂടി തുക സ്വരൂപിച്ച് ആ സ്ത്രിക്ക് വേണ്ടി തുക അടച്ച് കേസ് ഒത്തു തീർപ്പാക്കി. 

5. ചെയ്യുന്ന ദുഷ്പ്രവൃത്തികൾക്ക് കാലം കാത്തുവെച്ചിരിക്കുന്ന തിരിച്ചടികളെ പ്രതീക്ഷിക്കുക.

അയാള്‍ വന്നുകയറുന്നുടന്‍ മുതല്‍ അമ്മയെക്കുറിച്ചുള്ള പരാതികള്‍ അവള്‍ പറഞ്ഞുതുടങ്ങും. വയസ്സായതള്ള അടങ്ങിയിരിക്കുന്നി ല്ലന്നാണ് അവളുടെ പരാതി.അയാളുടെ അമ്മയ്ക്ക് വയസ്സ് എണ്‍പതു കഴിഞ്ഞു. പ്രഷറും ഷുഗറും കൊളസ്ട്രോളും അവരെ തളര്‍ത്താന്‍ തുടങ്ങിയിരുന്നു. ബിസ്‌നസ്സ്കാരനായ ഒറ്റ മകന് അമ്മയെ നോക്കാന്‍ സമയം ഇല്ലായിരുന്നു.പ്രത്യേകിച്ച് തൊഴിലൊന്നും ഇല്ലാത്ത മരുമകള്‍ക്കും അമ്മായിഅമ്മയെ നോക്കാന്‍ സമയം ഇല്ലായിരുന്നു.കെന്നല്‍ ക്ലബില്‍ കൊണ്ടുപോകുന്ന പട്ടികുട്ടിക്ക് നല്‍കുന്ന പരിചരണം പോലും മരുമകള്‍ അമ്മായിയമ്മയ്ക്ക് നല്‍കിയില്ല.

വയസ്സായതള്ളയെ വീട്ടില്‍ താമസിപ്പിക്കുന്നത് കുറച്ചിലാണന്ന് അവള്‍ അവനോട് പറഞ്ഞു.അവളുടെ ക്ലബിലെ എല്ലാവരുടേയും അമ്മായിയമ്മമാര്‍ ഓള്‍ഡേജ് ഹോമിലാണത്രെ താമസിക്കുന്നത്. അതാണത്രെ സ്റ്റാറ്റസ്.അവളുടെ കലഹം അസഹനീയമായപ്പോള്‍ അയാള്‍ അമ്മയെ ഓള്‍ഡേജ് ഹോമിലാക്കാന്‍ തീരുമാനിച്ചു.മാസം പതിനായിരം രൂപ നല്‍കേണ്ട ഓള്‍ഡേജ് ഹോമില്‍ മുറി ബുക്ക് ചെയ്യാന്‍ അയാളും ഭാര്യയും ഇറങ്ങി.അഞ്ചാം ക്ലാസില്‍ പഠിക്കുന്ന അവരുടെ മകനും അവരുടെയൊപ്പം ചെന്നു.ഓള്‍ഡേജ് ഹോമിലെ ഒരു കട്ടിലിന് രണ്ടുലക്ഷം രൂപയാണ് ഡിപ്പോസിറ്റ് എന്ന് ഡയറക്ടര്‍ പറഞ്ഞു.അയാള്‍ രണ്ടുലക്ഷം രൂപയുടെ ചെക്ക് നല്‍കി അമ്മയ്ക്ക് വേണ്ടി കട്ടില്‍ ബുക്ക് ചെയ്തു.

അയാളുടെ മകന്‍ അയാളോട് പറഞ്ഞു.

“ഡാഡീ,ഒരു രണ്ടുലക്ഷം രൂപയുടെ ചെക്ക് കൂടി എഴുതികൊടുത്ത് ഒരു കട്ടിലൂടെ ബുക്ക് ചെയ്യ്...”

“എന്തിനാ മോനേ..”അയാള്‍ ചോദിച്ചു.

“പത്ത് നാല്‍പ്പത് വര്‍ഷം കഴിയുമ്പോള്‍ ഡാഡിക്ക് വേണ്ടിയാ.... എനിക്കന്ന് കട്ടില്‍ ബുക്ക് ചെയ്യാന്‍ സമയം കിട്ടിയില്ലങ്കിലോ?” മകന്‍ പറഞ്ഞു.അയാളുടെ കണ്ണ് നിറഞ്ഞു.പക്ഷേ അയാള്‍ നിസഹായകനായിരുന്നു.

തിരിച്ച് വണ്ടിയോടിക്കുമ്പോള്‍ അയാള്‍ സംസാരിച്ചില്ല.തിരിച്ചുള്ള യാത്രയില്‍ അവള്‍ മകനോട് ചോദിച്ചു.

“മോന്‍ പപ്പയോട് മുറിബുക്ക് ചെയ്യാന്‍ പറഞ്ഞപ്പോള്‍ മമ്മിക്കുകൂടി മുറിബുക്ക് ചെയ്യാന്‍ പറയാഞ്ഞത് മോന് മമ്മിയോട് ഒത്തിരി ഇഷ്ടമുണ്ടായിട്ടാണോ ?”

“മമ്മിയോട് ഇഷ്ടമുണ്ടായിട്ടില്ല..... മമ്മി അമ്മച്ചിയോട് ചെയ്യുന്നതിന് എനിക്ക് എനിക്ക് എണ്ണിയെണ്ണി പകരം ചോദിക്കണം.മമ്മി ഓള്‍ഡേജ് ഹോമില്‍ പോയാല്‍ ഞാനെങ്ങനെ പകരം ചോദിക്കും??”

അവന്റെ ശബ്‌ദ്ദം ഉറച്ചതായിരുന്നു.

6. അശക്തരാണന്ന് കരുതുന്നവരിലെ ശക്തി തിരിച്ചറിയുക.

ഒരിക്കൽ ഒരു മനുഷ്യൻ കാട്ടിലൂടെ യാത്ര ചെയ്യുകയായിരുന്നു. പെട്ടന്ന് ആകാശത്ത് മഴക്കാറുകൾ നിറഞ്ഞു. ഭയങ്കര മഴ. കാട്ടിൽ ഇരുട്ട് പരക്കുന്നു. ആ മനുഷ്യൻ തന്റെ കുടൂംബത്തെ ഓർത്തു. തന്നെ കാത്തിരിക്കുന്ന കുട്ടികളെ ഓർത്തു. എത്രയും പെട്ടന്ന് വീട്ടിൽ എത്തണം. അയാൾ മഴയത്ത് നടന്നു. പക്ഷേ ഇടയ്ക്കെപ്പോഴോ വഴി തെറ്റി. കൈയ്യിൽ വെളിച്ചം ഇല്ല. വഴി തിരിച്ചറിയാൻ പറ്റുന്നില്ല. അതുവഴി വന്നൊരു മിന്നാമിനുങ്ങ് ഈ മനുഷ്യനെ കണ്ടു.മിന്നാമിനുണ്ട് അയാളോട് സംസാരിച്ചു. അവസാനം മിന്നാമിനുങ്ങ് അയാളോട് പറഞ്ഞു.

"ഞാൻ നിങ്ങൾക്ക് വഴി കാണിച്ച് തരാം" 

ഇതുകേട്ടപ്പോൾ അയാൾ ചിരിച്ചു. ഇച്ചിരിപോന്ന ഒരു മിന്നാമിനുങ്ങിന്റെ വെട്ടത്തിലെങ്ങനെ വഴികാണും? മിന്നാമിനുങ്ങ് പെട്ടന്ന് തന്റെ കൂട്ടൂകാരെ വിളിച്ചുകൊണ്ട് വന്നു. അനേകായിരും മിന്നാമിനുങ്ങൾ ഒരുമിച്ച് വന്നപ്പോൾ അയാൾക്ക് തന്റെ വഴികണ്ടത്താൻ കഴിഞ്ഞു. ആ മിന്നാമിനുങ്ങുകൾ അയാൾക്ക് നൽകിയ പ്രകാശത്തിൽ അയാൾ വീടെത്തി. 

നമ്മുടെ ചെറിയ സഹായം ഒരു മിന്നാമിനുങ്ങിന്റെ വെട്ടമായി കരുതിക്കൂടേ?. പാർശ്വവത്ക്കരിക്കപ്പെട്ട് സമൂഹത്തിൽ ഒറ്റപ്പെട്ട് കഴിയുന്ന ഓരോരുത്തരയും സമൂഹത്തിന്റെ ഭാഗമാക്കി മാറ്റാൻ നമുക്ക് കഴിയണം. 

image source :: http://www.postconsumers.com/education/wp-content/uploads/2012/02/new-years-resolutions.jpg

.